ക്രൈസ്റ്റ്ചര്ച്ച്: ന്യൂസ്ലാന്റില് സൂപ്പര്മാര്ക്കറ്റില് കത്തി കൊണ്ട് ആക്രമണം അഴിച്ചുവിട്ട ഐഎസ് തീവ്രവാദിയെ വെടിവെച്ചു കൊന്നു. ന്യൂസ്ലാന്റ് നഗരമായ ഓക്ലാന്റിലെ സൂപ്പര്മാര്ക്കറ്റിലേക്ക് അതിക്രമിച്ചുകയറിയ ആക്രമി കത്തി വീശി നടത്തിയ ആക്രമണത്തില് ആറ് പേര്ക്ക് പരുക്കേറ്റിട്ടുണ്ട്. ആക്രമണം തുടങ്ങി ഒരു മിനിറ്റിനുള്ളില് പൊലിസ് ആക്രമിയെ വെടിവെച്ച് കീഴ്പ്പെടുത്തുകയായിരുന്നു. ന്യൂസിലാന്റ് പ്രധാനമന്ത്രി ജസീന്ത ആര്ദെന് സംഭവം ഭീകരാക്രമണമാണെന്ന് സ്ഥിരീകരിച്ചു. സംഭവം തീവ്രവാദി ശ്രീലങ്കന് സ്വദേശിയാണെന്നും ഐഎസ് ഭീകരസംഘടനയുമായി ബന്ധമുണ്ടെന്നും ആര്ദെന് പറഞ്ഞു. ആക്രമണത്തില് പരുക്കേറ്റ മൂന്ന് പേരുടെ നില ഗുരുതരമാണ്. 2011ല് ന്യൂസിലാന്റിലെത്തിയ ശ്രീലങ്കന് സ്വദേശിയാണ് ആക്രമണത്തിന് പിന്നിലെന്നും അദ്ദേഹം ഒറ്റക്കാണ് ആക്രമണം നടത്തിയതെന്നും ജസീന്ത വാര്ത്ത സമ്മേളനത്തില് പറഞ്ഞു.
ഓക്ലാന്റ് മേഖലയിലെ ലിന്മാള് ഷോപ്പിങ് സെന്ററിലാണ് ആക്രമണമുണ്ടായത്. ഷോപ്പിങ് മാളുകളില് നിന്ന് ആളുകള് പരിഭ്രാന്തരായി ഓടുന്നതും ആക്രമിയെ പൊലിസ് കീഴ്പ്പെടുത്തുന്നതിന്റെയും വീഡിയോ സോഷ്യല് മീഡിയയില് പ്രചരിച്ചിരുന്നു. പൊലിസ് ആറ് റൗണ്ട് വെടിയാണുതിര്ത്തത്. ഭീകര ബന്ധമുണ്ടെന്ന സംശയമുള്ളതിനാല് ഇയാളെ വളരെ സൂക്ഷ്മമായി നിരീക്ഷിച്ചിരുന്നെന്ന് പോലീസ് കമ്മീഷണര് ആന്ഡ്രൂ കോസ്റ്റര് പറഞ്ഞു. വെള്ളിയാഴ്ച വീട്ടില് നിന്ന് സൂപ്പര്മാര്ക്കറ്റിലേക്ക് എത്തുന്നതു വരെ അയാളെ പിന്തുടര്ന്നുവെന്ന് കോസ്റ്റര് പറഞ്ഞു.
