സ്വച്ഛ് ഭാരത് മിഷന്‍ രണ്ടാംഘട്ടം മാര്‍ഗനിര്‍ദേശങ്ങള്‍ നടപ്പിലാക്കുന്നു; മുന്നൂറു ഗ്രാമ പഞ്ചായത്തുകള്‍ ഒക്‌ടോബര്‍ രണ്ടിനു മുന്‍പ് ഒഡിഎഫ് പ്ലസ് ആകും

കൊല്ലം: കേന്ദ്ര സര്‍ക്കാര്‍ പുറപ്പെടുവിച്ചിട്ടുള്ള സ്വച്ഛ് ഭാരത് മിഷന്‍ (ഗ്രാമീണ്‍) രണ്ടാംഘട്ടം മാര്‍ഗനിര്‍ദേശങ്ങള്‍ പ്രകാരം 2021-22ല്‍ ഒഡിഎഫ് പ്ലസ് (വെളിയിട വിസര്‍ജ്ജന വിമുക്തം) ആക്കുന്നതിന് സംസ്ഥാനത്ത് 500 വില്ലേജുകള്‍ ഉള്‍പ്പെട്ട 300ഗ്രാമ പഞ്ചായത്തുകളില്‍ നടപടികള്‍ ആരംഭിച്ചു. കേന്ദ്രസര്‍ക്കാര്‍ അംഗീകരിച്ച വാര്‍ഷിക കര്‍മ പദ്ധതി പ്രകാരം 2021 ഒക്‌ടോബര്‍ രണ്ടിനകം ഈ പഞ്ചായത്തുകളെ ഒഡിഎഫ് പ്ലസ് ആയി പ്രഖ്യാപിക്കണം. ഇതിനായി നിശ്ചയിക്കപ്പെട്ട ഗ്രാമ പഞ്ചായത്തുകള്‍ക്കുള്ള നിര്‍ദേശങ്ങള്‍ സ്‌പെഷല്‍ സെക്രട്ടറി ആര്‍.എസ്. കണ്ണന്‍ പുറപ്പെടുവിച്ചു.  

എല്ലാ വീടുകളിലും ഉപയോഗ യോഗ്യമായ ശൗചാലയങ്ങള്‍ ഉറപ്പാക്കുക, ഗ്രാമങ്ങളില്‍ പൊതു ശൗചാലയം കൃത്യമായ പരിപാലനത്തോടു കൂടി ഉറപ്പാക്കുക, സ്‌കൂളുകള്‍, പഞ്ചായത്ത് ആസ്ഥാനങ്ങള്‍, അങ്കണവാടികള്‍ എന്നിവയില്‍ പുരുഷനും സ്ത്രീക്കും പ്രത്യേകമായി ഉപയോഗ യോഗ്യമായ ശൗചാലയങ്ങള്‍ ഉണ്ടെന്ന് ഉറപ്പു വരുത്തുക, പൊതുയിടങ്ങള്‍ വൃത്തിയുള്ളതും മലിനജലം കെട്ടി നില്‍ക്കാതെയും പ്ലാസ്റ്റിക് കൂമ്പാരങ്ങള്‍ ഇല്ലാതെയും സംരക്ഷിക്കണമെന്നും ഉത്തരവിലുണ്ട്.  

ചുരുങ്ങിയത് 80 ശതമാനം വീടുകളിലും എല്ലാ സ്‌കൂളുകളിലും അങ്കണവാടികളിലും പഞ്ചായത്ത് ആസ്ഥാനങ്ങളിലും ജൈവ മാലിന്യങ്ങളും ദ്രവ മാലിന്യവും സംസ്‌കരിക്കുന്നതിനുള്ള സൗകര്യങ്ങള്‍ ഉണ്ടായിരിക്കണം. ഗ്രാമത്തില്‍ പ്ലാസ്റ്റിക് തരംതിരിക്കുന്നതിനും അത് ശേഖരിക്കുന്നതിനുമുള്ള സംവിധാനം, ഗ്രാമങ്ങളില്‍ ഒഡിഎഫ് പ്ലസുമായി ബന്ധപ്പെട്ട പ്രധാനപ്പെട്ട അഞ്ചു വിവര വിജ്ഞാപന സന്ദേശങ്ങള്‍ പ്രാമുഖ്യത്തോടെ പ്രദര്‍ശിപ്പിക്കുക എന്നിവയാണ് നല്കിയിരിക്കുന്ന പ്രധാന നിര്‍ദേശങ്ങള്‍.

ഈ ഘടകങ്ങളെല്ലാം ഗ്രാമ പഞ്ചായത്ത് പ്രദേശത്ത് കൃത്യമായി നിലവിലുണ്ടെന്ന് ഉറപ്പാക്കി ഓരോ ഗ്രാമപഞ്ചായത്തിലെയും അതാത് വാര്‍ഡുകളിലെ ഗ്രാമ സഭകള്‍ ഓഡിഎഫ് പ്ലസ് ആയി പ്രഖ്യാപിക്കുകയും ഗ്രാമ പഞ്ചായത്ത് മൊത്തമായി ഒഡിഎഫ് പ്ലസ് ആയി പ്രഖ്യാപിക്കേണ്ടതുമാണ്. ഗ്രാമ പഞ്ചായത്തുകളുടെ ഒഡിഎഫ് പ്രഖ്യാപനത്തിനു ശേഷം ജില്ലാതല ഗ്രാമ പഞ്ചായത്ത് തല മോണിട്ടറിങ് സംഘം പരിശോധന നടത്തി നിര്‍ദേശങ്ങള്‍ കൃത്യമായി പാലിച്ചിട്ടുണ്ടെന്ന് ഉറപ്പു വരുത്തണം.  

ജില്ലാ കളക്ടര്‍ ചെയര്‍മാനായുള്ളതാണ് ജില്ലാ തല മോണിട്ടറിങ് സംഘം. പഞ്ചായത്ത് ഡെപ്യൂട്ടി ഡയറക്ടര്‍, ജില്ലാ ഹരിതകേരള മിഷന്‍ കോ-ഓര്‍ഡിനേറ്റര്‍, ജില്ലാ ശുചിത്വ മിഷന്‍ കോ-ഓര്‍ഡിനേറ്റര്‍ എന്നിവരാണ് അംഗങ്ങള്‍. ബ്ലോക്ക് പഞ്ചായത്ത് സെക്രട്ടറി ചെയര്‍മാനായിട്ടുള്ളതാണ് ഗ്രാമ പഞ്ചായത്ത് തല പരിശോധന ടീം. സപ്തംബര്‍ 10 മുതല്‍ 20വരെയുള്ള കാലയളവില്‍ ഗ്രാമ പഞ്ചായത്തുകളില്‍ പരിശോധന നടത്തിയാണ് പഞ്ചായത്തുകളെ ഒഡിഎഫ് പ്ലസ് ആയി പ്രഖ്യാപിക്കേണ്ടത്.