പാലാ: കിടങ്ങൂരിലും പരിസരങ്ങളിലും വില്‍പ്പനയ്‌ക്കായി എത്തിച്ച രണ്ട് കിലോ കഞ്ചാവുമായി കിടങ്ങൂരില്‍ മൂന്ന് യുവാക്കള്‍ അറസ്റ്റില്‍. രണ്ട് പേര്‍ രക്ഷപ്പെട്ടു. കിടങ്ങൂര്‍ എഞ്ചിനീയറിംഗ് കോളേജിന് സമീപം തട്ടേകാട്ടില്‍ ശ്രീജിത്ത് ബെന്നി (23), ചേര്‍പ്പുങ്കല്‍ കല്ലൂര്‍ പള്ളിയ്‌ക്ക് സമീപം കളരിയ്‌ക്കല്‍ അമല്‍ (23), സഹോദരന്‍ അതുല്‍ ( 22 ) എന്നിവരാണ് പിടിയിലായത്.
ഇവരോടൊപ്പം ഉണ്ടായിരുന്ന പടിഞ്ഞാറ്റില്‍ കരപാളയം പനയംചാലില്‍ ജറിന്‍ പി. റ്റോം, ഏറ്റുമാനൂര്‍ സ്വദേശിയായ ജോബി എന്നിവര്‍ക്ക് വേണ്ടി തിരച്ചില്‍ തുടരുകയാണെന്ന് പോലീസ് പറഞ്ഞു. വില്‍പ്പനയ്‌ക്കായി കൈവശം സൂക്ഷിച്ച ചെറു കഞ്ചാവ് പായ്‌ക്കറ്റുകളും ബാഗിലാക്കി ചേര്‍പ്പുങ്കല്‍ ഭാഗത്തെ ലോഡ്ജ് മുറിയില്‍ ബാഗില്‍ സൂക്ഷിച്ച കഞ്ചാവുമാണ് പിടികൂടിയത്.
പാലാ ഡിവൈഎസ്പിയുടെ നിര്‍ദ്ദേശ പ്രകാരം കിടങ്ങൂര്‍ എസ്എച്ച്ഒ കെ.ആര്‍. ബിജു, കിടങ്ങൂര്‍ എസ്‌ഐ കുര്യന്‍ മാത്യു, റെജി പി. ജോസഫ്, എഎസ്‌ഐ മഹേഷ് കൃഷ്ണന്, എന്‍. ഹരിഹരന്‍, എം.ജി. സുനില്‍കുമാര്‍, കെ.കെ. സന്തോഷ്, ജയചന്ദ്രന്‍ എന്നിവരാണ് അന്വേഷണ സംഘത്തിലുണ്ടായിരുന്നത്.
