ന്യൂദല്ഹി: ടോക്കിയോ ഒളിംപിക്സില് വ്യക്തിഗത സ്വര്ണം സ്വന്തമാക്കിയതോടെ ഈ നേട്ടത്തിലെത്തുന്ന രണ്ടാമത്തെ ഇന്ത്യക്കാരനായി നീരജ് ചോപ്ര മാറിയതിന് പിന്നാലെ ഇന്ത്യന് സൈനികരെ ഇത്തരം മത്സരങ്ങള്ക്കായി പരിശീലിപ്പിക്കണമെന്ന് നിര്ദേശിക്കുന്ന പ്രധാനമന്ത്രി നരേന്ദ്രമോദിയുടെ വീഡിയോ സമൂഹമാധ്യമങ്ങളില് വൈറലായി. ഒളിംപിക്സ് ചരിത്രത്തില് ഇന്ത്യക്ക് ആദ്യ അത്ലറ്റിക്സ് സ്വര്ണമാണ് കരസേനയില് സുബേദാറായ 23-കാരനായ നീരജ് ചോപ്ര ശനിയാഴ്ച നേട്ടിത്തന്നത്. സ്വര്ണത്തില് മുത്തമിടാൻ ജാവലിന് ത്രോ മത്സരത്തില് അദ്ദേഹം 87.58 മീറ്റര് ദൂരം എറിഞ്ഞു.
ഗുജറാത്ത് മുഖ്യമന്ത്രിയായിരിക്കെ നരേന്ദമോദി നടത്തിയ പ്രസംഗമാണ് ഇപ്പോള് സമൂഹമാധ്യമങ്ങളില് വ്യാപകമായി പ്രചരിക്കുന്നത്. വലിയ ജനസംഖ്യയുണ്ടായിട്ടും ഒളിംപിക്സില് മെഡലുകള് സ്വന്തമാക്കാന് രാജ്യം ബുദ്ധിമുട്ടുന്നുവെന്ന് അദ്ദേഹം പറയുന്നു. പുതിയതായി സൈന്യത്തില് ചേരുന്നവരില് സ്പോര്ട്സില് താത്പര്യമുള്ള സൈനികരെ ഒളിംപിക്സിനായി പരിശീലിപ്പിക്കാന് കഴിയുമെന്ന് പൂനയിലെ ഫെര്ഗൂസണ് കോളജിലെ വിദ്യാര്ഥികളെ അഭിസംബോധന ചെയ്ത് മോദി ചൂണ്ടിക്കാട്ടി.
‘1.2 ബില്യണ് ജനസംഖ്യയുള്ള രാജ്യത്തിന് ഒളിംപിക്സില് സ്വര്ണം നേടാന് കഴിയില്ലേ?. ആളുകള് പലപ്പോഴും വിലപിക്കുന്നത് കേട്ടിട്ടുണ്ട്. മത്സരങ്ങള് നടക്കുന്ന ഓരോ നാല് വര്ഷംകൂടുമ്പോഴും ഇത് ചോദിക്കുന്നു. പ്രശ്നങ്ങളുണ്ടെന്ന് ഞാന് മനസിലാക്കുന്നു. എങ്കിലും വിദ്യാഭ്യാസ സംവിധാനവുമായി സ്പോര്ട്സിനെ ബന്ധിപ്പിക്കാന് നാം എന്തെങ്കിലും ശ്രമം നടത്തിയിട്ടുണ്ടോ?. യുവജനങ്ങള്ക്ക് നാം ആവശ്യമായ അവസരങ്ങള് നല്കിയിട്ടുണ്ടോ?’.-സദസിലിരിക്കുന്നവരോട് പ്രധാനമന്ത്രി നരേന്ദമോദി ചോദിക്കുന്നു.
‘ഈ ചുമതല സൈന്യത്തിലുള്ളവര്ക്ക് നല്കിയിരുന്നുവെങ്കില്, പുതുതായി സൈന്യത്തില് ചേരുന്ന സ്പോര്ട്സില് താത്പര്യമുള്ളവര്ക്ക് മികച്ച പരശീലനം നല്കിയാല് നിഷ്പ്രയാസം അഞ്ചു മുതല് 10 മെഡലുകള് കൊണ്ടുവരാനാകും’.- അദ്ദേഹം തുടര്ന്നു. മോദിയുടെ ഔദ്യോഗിക യുട്യൂബ് ചാനലിലും വീഡിയോയുണ്ട്. ടോക്കിയോ ഒളിംപിക്സില് സൈന്യത്തിന്റെ വിജയത്തിന് പിന്നിലുള്ള ഇന്ത്യന് കരസേനയുടെ ഒളിംപിക്സ് ദൗത്യ സംഘത്തെ ചൂണ്ടിക്കാട്ടിയും ആളുകള് ഈ വീഡിയോ പരാമര്ശിച്ചു. നായിബ് സുബേദറായി നേരിട്ടുള്ള നിയമനം വഴിയാണ് നാല് രജ്പുത്താന റൈഫിള്സില് നീരജ് എത്തിയത്. പിന്നീട് പൂനയിലെ മിഷന് ഒളിംപിക്സ് വിംഗ് ആന്റ് ആര്മി സ്പോര്ട്സ് ഇന്സ്റ്റിറ്റ്യൂട്ടിലേക്ക് പരിശീലനത്തിനായി തെരഞ്ഞെടുക്കപ്പെട്ടു.
