മലപ്പുറം : എതിരഭിപ്രായം പറയുന്നവരോട് പാര്ട്ടിക്ക് പകയില്ലെന്നും വിമര്ശനങ്ങളും വിയോജിപ്പുകളും ജനാധിപത്യത്തിന്റെ ഭാഗമാണ്. മുസ്ലിം ലീഗിനുള്ളിലെ തര്ക്കത്തില് ഹൈദരലി തങ്ങളുടെ മകനും യൂത്ത് ലീഗ് ദേശീയ വൈസ് പ്രസിഡന്റുമായ മുഇനലി തങ്ങള്ക്ക് പരോക്ഷ പിന്തുണയുമായി ലീഗ് നേതാവ് കെഎം ഷാജി. ഫേസ്ബുക്ക് പോസ്റ്റിലൂടെയാണ് കെ.എം. ഷാജി ഇക്കാര്യം അറിയിച്ചത്.
ഇരുമ്പു മറകളില് അടച്ചിട്ട നിശ്വാസങ്ങളല്ല മുസ്ലിം ലീഗില് നിന്ന് പുറത്ത് വരുന്നത്, അഭിപ്രായ സ്വാതന്ത്ര്യത്തിന്റെ ഒഴുക്കാണ്. ഇവിടെ എതിരഭിപ്രായക്കാരനോട് പകയില്ല. എതിരഭിപ്രായം പറയുന്നവര് ശാരീരികമായോ ധാര്മ്മികമായോ കൊല്ലപ്പെടുന്ന രാഷ്ട്രീയ പരിസരത്ത് നില്ക്കുന്നവര്ക്ക് ഈ ഒഴുക്ക് മനസ്സിലാവില്ലെന്നായിരുന്നു കെ.എം. ഷാജിയുടെ എഫ്ബി പോസ്റ്റില് പറയുന്നത്.
ചന്ദ്രിക ദിനപത്രത്തിന്റെ അക്കൗണ്ടിലൂടെ 10 കോടിയുടെ കള്ളപ്പണം വെളുപ്പിച്ചെന്ന കേസില് പാണക്കാട് ഹൈദരലി തങ്ങള്ക്ക് എന്ഫോഴ്സ്മെന്റ് കഴിഞ്ഞ ദിവസം നോട്ടീസ് അയച്ചിരുന്നു. ഇതിന് പിന്നാലെ കെ.ടി. ജലീല് വാര്ത്താ സമ്മേളനം നടത്തുകയും ഹൈദരലി തങ്ങള്ക്ക് ഇതില് പങ്കില്ലെന്നും വിഷയത്തില് കുഞ്ഞാലിക്കുട്ടിക്കെതിരെ രൂക്ഷ വിമര്ശനം ഉയര്ത്തുകയും ചെയ്തിരുന്നു.
അതിനുപിന്നാലെ ലീഗിനുള്ളില് തന്നെ എതിരഭിപ്രായങ്ങള് ഉടലെടുക്കുകയും എന്ഫോഴ്സ്മെന്റ് നോട്ടീസ് ലഭിക്കാന് കാരണം കുഞ്ഞാലിക്കുട്ടിയും ഇബ്രാഹിം കുഞ്ഞുമാണെന്ന് മുഇനലി വാര്ത്താ സമ്മേളനം നടത്തി ആരോപിച്ചു. 40 വര്ഷമായി പാര്ട്ടി ഫണ്ട് കൈകാര്യം ചെയ്യുന്നത് കുഞ്ഞാലിക്കുട്ടിയാണൈന്നായിരുന്നു ആരോപണം. ഇത് വിവാദമായതിന് പിന്നാലെ മുഇനലി തങ്ങളുടെ നടപടി തെറ്റാണെന്ന് അദ്ദേഹത്തെ ബോധ്യപ്പെടുത്തിയതായി മുസ്ലീം ലീഗ് നേതൃത്വം കഴിഞ്ഞ ദിവസം വ്യക്തമാക്കിയിരുന്നു.
