തൃശൂര് : കരുവന്നൂര് സഹകരണ ബാങ്ക് വായ്പ്പാ തട്ടിപ്പ് കേസിലെ പ്രതികളുടെ വീടുകളില് ക്രൈം ബ്രാഞ്ച് തെരച്ചിലില്. കേസിലെ മുഖ്യ പ്രതികളായ റെജി അനില് കുമാര്, കിരണ്, ബിജു, കരീം, ബിജോയ് എ കെ, ടി.ആര് സുനില് കുമാര്, സി.കെ. ജില്സ് എന്നിവരുടെ ഇരിങ്ങാലക്കുട, പൊറത്തിശേരി, കൊരുമ്പിശേരി എന്നിവിടങ്ങളില് വീടുകളിലാണ് പരിശോധന നടക്കുന്നത്.
ക്രൈംബ്രാഞ്ച് ആറ് സംഘങ്ങളായി തിരിഞ്ഞാണ് അന്വേഷണ സംഘത്തിന്റെ പരിശോധന. പ്രതികളാരും വീടുകളിലില്ല. ഉദ്യോഗസ്ഥര് വീട്ടുകാരില് നിന്നും വിവരങ്ങള് ശേഖരിക്കുകയാണ്. ഭൂമിയുടെയും നിക്ഷേപത്തിന്റെയും രേഖകള്ക്കായാണ് അന്വേഷണ സംഘം പ്രതികളുടെ വീടുകളില് പരിശോധന നടത്തുന്നത്.
അതേസമയം പ്രതികള് സംസ്ഥാനത്തിന്റെ പലയിടത്തും നിക്ഷേപം നടത്തിയതായി സൂചനയുണ്ട്. ഇരിങ്ങാലക്കുടയില് രജിസ്റ്റര് ചെയ്ത നാല് സ്വകാര്യ കമ്പനികള്ക്കും കരുവന്നൂര് ബാങ്ക് ത്ട്ടിപ്പുമായി ബന്ധമുണ്ടെന്നും സംശയമുണ്ട്. പെസോ ഇന്ഫ്രാസ്ട്രക്ച്ചേഴ്സ്, സിസിഎം ട്രഡേഴ്സ്, മൂന്നാര് ലക്സ് വേ ഹോട്ടല്സ്, തേക്കടി റിസോര്ട്ട് എന്നീ കമ്പനികളില് പ്രതികള്ക്ക് പങ്കാളിത്തമുള്ളതായി കണ്ടെത്തിയിട്ടുണ്ട് ഇതിന്റെ അടിസ്ഥാനത്തിലാണ് അന്വേഷണം ഈ കമ്പനികളിലേക്കും നീട്ടുന്നത്.
അതിനിടെ കരുവന്നൂര് തട്ടിപ്പ് അന്വേഷിക്കുന്ന ക്രൈംബ്രാഞ്ച് സംഘം ഭരണസമിതിയംഗങ്ങളില് നിന്നും അല്പ്പസമയത്തിനുള്ളില് മൊഴിയെടുക്കും. തൃശൂരില് ക്രൈംബ്രാഞ്ച് ഓഫീസില് രാവിലെ നേരിട്ട് ഹാജരാവാന് ഡയറക്ടര്മാരോട് നിര്ദ്ദേശിച്ചിട്ടുണ്ട്.
കരുവന്നൂര് ബാങ്ക് വായ്പ തട്ടിപ്പ് കേസിലെ പ്രതികളായ സിപിഎം അംഗങ്ങള്ക്കെതിരായ നടപടി ചര്ച്ച ചെയ്യാന് സിപിഎം തൃശ്ശൂര് ജില്ലാ സെക്രട്ടറി അടിയന്തിര യോഗവും വിളിച്ചു ചേര്ത്തിട്ടുണ്ട്. എല്ഡിഎഫ് കണ്വീനര് എ.വിജയരാഘവന്റെ സാന്നിധ്യത്തിലായിരിക്കും യോഗം. കരുവന്നൂര് ബാങ്ക് വായ്പ്പ തട്ടിപ്പ് കേസിലെ പ്രതികളായ സിപിഎം അംഗങ്ങള്ക്കെതിരായ നടപടിയും ചര്ച്ച ചെയ്യും. ലോക്കല് കമ്മിറ്റി അംഗങ്ങളായ ബാങ്ക് സെക്രട്ടറി ടി.ആര്. സുനില്കുമാറും ബാങ്ക് മാനേജര് ബിജു കരീമും ഉള്പ്പെടെ ആറു പേരാണ് കേസിലെ പ്രതികള്. ചീഫ് അക്കൗണ്ടന്റ് സി.കെ. ജില്സും പാര്ട്ടി അംഗമാണ്. ഇവരെ പാര്ട്ടിയില് നിന്നും പുറത്താക്കിയിട്ടുണ്ട്.
