മുംബൈ: കനത്ത മഴമൂലം മഹാരാഷ്ട്രയിലെ റായ്ഗഡ് ജില്ലയിലെ മഹദിലുണ്ടായ വിവിധ മണ്ണിടിച്ചില് സംഭവങ്ങളില് 36 പേര് മരിച്ചു. മണ്ണില് കുടുങ്ങിക്കിടക്കുന്ന 30 പേര്ക്ക് വേണ്ടി ദേശീയ ദുരന്തനിവാരണ സേന തിരച്ചില് തുടരുകയാണ്. അതേ സമയം സ്ഥലത്തെത്തിയ ദേശീയ ദുരന്തനിവാരണസേനയുടെ സഹായത്തോടെ ആയിരം പേരെ ദുരന്തസ്ഥലങ്ങളില് നിന്നും രക്ഷപ്പെടുത്തി.
12 പ്രാദേശിക രക്ഷാസംഘങ്ങളും നാവികസേനയുടെ രണ്ട് സംഘങ്ങളും കോസ്റ്റ് ഗാര്ഡിന്റെ രണ്ട് സംഘങ്ങളും ദേശീയ ദുരന്തനിവാരണസേനയുടെ മൂന്ന് സംഘങ്ങളും രക്ഷാപ്രവര്ത്തനം തുടരുകയാണ്. മഹദിലാണ് ദുരന്തം കൂടുതലായി അനുഭവപ്പെട്ടത്. രക്ഷാപ്രവര്ത്തനങ്ങള്ക്ക് ഹെലികോപ്റ്ററുകളും ഉപയോഗിക്കുന്നുണ്ട്.
തലായില് നിന്നും 32 മൃതദേഹങ്ങള് കണ്ടെടുത്തു. നാല് പേരുടെ മൃതദേഹങ്ങള് സഖസുതര്വാഡി ഗ്രാമത്തില് നിന്നും കണ്ടെത്തി. 15 പേരെ തിരിച്ചിലില് മണ്ണിനടയില് നിന്നും ജീവനോടെ കണ്ടെടുത്തു. ഇപ്പോഴും 30ഓളം പേര് കുടുങ്ങിക്കിടക്കുകയാണെന്ന് ജില്ലാ കളക്ടര് നിധി ചൗധരി പറയുന്നു. ഇവര്ക്കായുള്ള തിരച്ചില് ശക്തമാക്കി. മണ്ണിടിച്ചില് മൂലം ഗതാഗത തടസ്സവും വെള്ളക്കെട്ടുകളും ഉണ്ടായതിനാല് രക്ഷാപ്രവര്ത്തനത്തിനുള്ള സംവിധാനങ്ങള് എത്താന് വൈകി. രക്ഷാപ്രവര്ത്തനത്തിന് സൈന്യത്തെ എത്തിക്കാന് കേന്ദ്രസര്ക്കാരിനോട് അഭ്യര്ത്ഥിച്ചതായി റായ്ഗഡ് മന്ത്രി അതിഥി തത്കാരെ പറഞ്ഞു.
വെള്ളിയാഴ്ച മുഖ്യമന്ത്രി ഉദ്ധവ് താക്കറെ ദുരന്തം സംഭവിച്ച സ്ഥലങ്ങള് സന്ദര്ശിച്ചു.
