കൊല്ലം: എഴുകോണ്‍ സര്‍വീസ് സഹകരണ ബാങ്കിലെ സാമ്പത്തിക ക്രമക്കേട് കണ്ടെത്തിയതിലൂടെ പുറത്തു വരുന്നത് കോടികളുടെ അഴിമതി. 1.66 കോടി രൂപയുടെ സാമ്പത്തിക ക്രമക്കേടിനെ തുടര്‍ന്ന് എഴുകോണ്‍ സര്‍വീസ് സഹകരണ ബാങ്കില്‍ നിന്ന് സിപിഎം നെടുവത്തൂര്‍ ഏരിയ കമ്മിറ്റി സെക്രട്ടറിയുടെ മകനുള്‍പ്പെടെ മൂന്നു ജീവനക്കാരെ പുറത്താക്കി. 1.66 കോടി രൂപ കൂടാതെ ഇവരുടെ മുന്‍കാല പ്രവര്‍ത്തനങ്ങളും ഇടപാടുകളും അന്വേഷണ സമിതി പരിശോധിക്കും.
ക്രമക്കേട് നടന്നതായി പറയുന്ന കാലയളവിലെ സെക്രട്ടറി കെ. അനില്‍കുമാര്‍, അക്കൗണ്ടന്റ് ബി. ബൈജു, അറ്റന്‍ഡര്‍ ടി.പി. സുജിത് എന്നിവരെയാണ് പുറത്താക്കിയത്. ഏരിയ സെക്രട്ടറി പി. തങ്കപ്പന്‍പിള്ളയുടെ മകനാണ് സുജിത്. അന്വേഷണ വിധേയമായി മാര്‍ച്ചില്‍ ഇവരെ സസ്‌പെന്‍ഡ് ചെയ്തിരുന്നു.
പിന്നീടുള്ള അന്വേഷണത്തില്‍ ക്രമക്കേട് ബോധ്യമായതോടെ പുറത്താക്കുകയായിരുന്നു. സിപിഎമ്മിന്റെ നേതൃത്വത്തിലുള്ള ഭരണസമിതിയാണ് ബാങ്ക് ഭരിക്കുന്നത്. സ്ഥിര നിക്ഷേപകര്‍ അറിയാതെ അവരുടെ നിക്ഷേപത്തുകയില്‍ നിന്ന് വായ്‌പ തട്ടിപ്പുള്‍പ്പെടെ നടത്തിയതായാണ് കണ്ടെത്തല്‍. കഴിഞ്ഞ വര്‍ഷം ഫെബ്രുവരിയിലാണ് ക്രമക്കേട് നടന്നതായി പറയുന്നത്. ക്രമക്കേട് അന്വേഷിക്കാന്‍ അച്ചടക്ക സമിതിയെ ബാങ്ക് നിയോഗിച്ചിരുന്നു.
നഷ്ടപ്പെട്ട തുക ക്രമക്കേട് നടത്തിയവരില്‍ നിന്ന് ഈടാക്കുമെന്നാണ് ബാങ്ക് അധികൃതര്‍ വ്യക്തമാക്കുന്നത്. എന്നാല്‍ സംഭവത്തില്‍ പാര്‍ട്ടിക്ക് പങ്കുണ്ടോയെന്നും അന്വേഷിക്കും. പ്രാഥമിക അന്വേഷണ റിപ്പോര്‍ട്ടിന്റെ അടിസ്ഥാനത്തിലാണ് ഇപ്പോള്‍ ഇവരെ പുറത്താക്കിയത്. എന്നാല്‍ സംഭവത്തെക്കുറിച്ച് പ്രതികരിക്കാന്‍ ബാങ്ക് പ്രസിഡന്റ് തയാറായിട്ടില്ല.
ജന്മഭൂമി ഓണ്‍ലൈന്‍