ന്യൂദല്‍ഹി: ജമ്മുകാശ്മീരിലെ പുല്‍വാമയില്‍ സ്‌പെഷ്യല്‍ പൊലീസ് ഓഫിസറും ഭാര്യയും മകളും ഭീകരാക്രമണത്തില്‍ കൊല്ലപ്പെട്ടു. വീട്ടില്‍ അതിക്രമിച്ചുകയറി ഭീകരര്‍ വെടിയുതിര്‍ക്കുകയായിരുന്നു. അവന്തിപ്പോറ ഹരിപരിഗം സ്വദേശി ഫയാസ് അഹമ്മദിനെതിരായിയുരുന്നു ആക്രമണം. ഇന്നലെ രാത്രി പതിനൊന്നോടെ വീടിനുളളില്‍ കടന്ന് ഭീകരര്‍ കുടുംബത്തിനുനേരെ വെടിവയ്‌ക്കുകയായിരുന്നുവെന്ന് പൊലീസ് പറയുന്നു.
പരിക്കേറ്റ ഫയാസിനെയും ഭാര്യ രാജാ ബീഗത്തെയും ഉടന്‍ ആശുപത്രിയിലെത്തിച്ചുവെങ്കിലും രക്ഷിക്കാനായില്ല. ചികിത്സയില്‍ കഴിഞ്ഞിരുന്ന മകള്‍ റാഫിയ ഇന്നു രാവിലെയാണ് മരിച്ചത്. പ്രദേശം വളഞ്ഞ് ഭീകരര്‍ക്കായി തെരച്ചില്‍ ആരംഭിച്ചുവെന്ന് സുരക്ഷാസേന അറിയിച്ചു. ജമ്മുകാശ്മീരിലെ വ്യോമതാവളത്തിനുനേരെ ഡ്രോണ്‍ ആക്രമണം നടന്ന അതേദിവസമാണ് വീണ്ടും ഭീകരര്‍ ആക്രമണം നടത്തിയത്.
