ന്യൂദല്ഹി: ഇനി ഡ്രൈവിങ് ടെസ്റ്റ് പാസാകാതെയും ലൈസന്സ് എടുക്കാം. ഒരു മാസം കാത്തിരുന്നാല് മതി. റീജണല് ട്രാന്സ്പോര്ട്ട് ഓഫീസ് നടത്തുന്ന ഡ്രൈവിങ് ടെസ്റ്റില് പങ്കെടുക്കാതെ ലൈസന്സ് നേടാനുള്ള അവസരം ഒരുങ്ങുകയാണ്. അക്രഡിറ്റഡ് ഡ്രൈവേഴ്സ് ട്രെയിനിങ് സെന്ററുകളില് നിന്ന് പരിശീലനം കഴിഞ്ഞവര്ക്കാണ് പരീക്ഷ പാസാവാതെ ലൈസന്സ് ലഭിക്കുക. ഇത്തരം സെന്ററുകള്ക്ക് ബാധകമാകുന്ന ചട്ടങ്ങള് ജൂലൈ ഒന്നിന് നിലവില് വരുമെന്ന് കേന്ദ്ര ഗതാഗതമന്ത്രാലയം പറഞ്ഞു.
ഓരോ മേഖലയ്ക്കും ആവശ്യമായ പ്രത്യേക പരിശീലനം നല്കാനും ഇത്തരം സെന്ററുകള്ക്ക് അനുമതിയുണ്ട്. 2019-ലെ മോട്ടോര് വാഹന ഭേദഗതി നിയമത്തിലെ എട്ടാം വകുപ്പാണ് അക്രഡിറ്റഡ് ഡ്രൈവേഴ്സ് ട്രെയിനിങ് സെന്ററുകള് സംബന്ധിച്ച ചട്ടമിറക്കാന് കേന്ദ്രത്തിന് അധികാരം നല്കുന്നത്. എന്നാല്, ഇത്തരം സെന്ററുകള് പൂര്ണമായും സര്ക്കാരിന് കീഴിലാകുമോ അതോ പൊതു-സ്വകാര്യ പങ്കാളിത്തത്തോടെയാകുമോ എന്നതു സംബന്ധിച്ചൊന്നും വ്യക്തത വന്നിട്ടില്ല.
ഉയര്ന്ന നിലവാരത്തില് പരിശീലനം നല്കാനുള്ള സംവിധാനങ്ങള് ഇത്തരം സെന്ററുകളില് ഉണ്ടായിരിക്കണമെന്ന് ചട്ടത്തില് പറയുന്നു. വിവിധ പ്രതലങ്ങളിലൂടെ വാഹനം ഓടിക്കുന്ന അനുഭവം കൃത്രിമമായി ലഭിക്കുന്ന സംവിധാനം, ഡ്രൈവിങ് ടെസ്റ്റ് ട്രാക്ക് എന്നിവ ഉണ്ടായിരിക്കണം. അക്രഡിറ്റഡ് സെന്ററുകളില് നിന്ന് പരിശീലനം പൂര്ത്തിയാക്കുന്നവര്ക്ക് അവിടെനിന്നുതന്നെ ലൈസന്സ് ലഭിക്കും.
