ന്യൂദല്‍ഹി: ഇന്ത്യയുടെ തദ്ദേശീയ വാക്‌സീനായ കൊവാക്‌സിന്‍ ഇറക്കുമതി ചെയ്യാന്‍ ബ്രസീല്‍ നിബന്ധനകളോട അനുമതി നല്‍കി. ബ്രസീലിലെ ആരോഗ്യ നിരീക്ഷണ ഏജന്‍സിയായ അന്‍വിസ, നേരത്തെ കൊവാക്‌സിന്‍ ഇറക്കുമതി ചെയ്യാന്‍ അനുമതി നിഷേധിച്ചിരുന്നു.
ഇന്ത്യയിലെ പ്ലാന്റില്‍ ശരിയായ ഉല്‍പാദനരീതി (ജിഎംപി) പാലിക്കുന്നില്ലെന്ന് ചൂണ്ടിക്കാട്ടിയാണ് അനുമതി നിഷേധിച്ചത്. ഹൈദരാബാദ് ആസ്ഥാനമായ ഭാരത് ബയോടെക്കാണ് വാക്‌സിന്‍ ഉല്‍പാദിപ്പിക്കുന്നത്.
ഉല്‍പാദനരീതിയില്‍ വരുത്തിയ മാറ്റങ്ങള്‍ വിശദീകരിച്ച് അന്‍വിസയ്‌ക്ക് ഭാരത് ബയോടെക് റിപ്പോര്‍ട്ടു നല്‍കിയതിനു പിന്നാലെയാണ് അനുമതി ലഭിച്ചത്. കഴിഞ്ഞ മാസം 25നാണ് വീണ്ടും അനുമതിക്ക് അപേക്ഷിച്ചത്. പ്രാഥമികഘട്ടത്തില്‍, 40 ലക്ഷം ഡോസ് വാക്‌സിനാകും ആദ്യഘട്ടത്തില്‍ ഇറക്കുമതി ചെയ്യുക. ഇതിന്റെ ഫലപ്രാപ്തി എത്രത്തോളമുണ്ടായിരിക്കും എന്നു നിരീക്ഷിച്ചശേഷമായിരിക്കും പിന്നീട് ഇറക്കുമതി ചെയ്യുന്നത് സംബന്ധിച്ച തീരുമാനം.
ബ്രസീലില്‍ കൊവാക്‌സിന്റെ ക്ലിനിക്കല്‍ ട്രയല്‍ നടത്താനും അന്‍വിസ അനുമതി നല്‍കി. റഷ്യന്‍ നിര്‍മിത സ്പുട്‌നിക് വാക്‌സിനും ബ്രസീലില്‍ ഇറക്കുമതിക്ക് അനുമതി നല്‍കി.
