തിരുവനന്തപുരം: നവജാത ശിശുക്കള്ക്കും കുട്ടികള്ക്കും കൊവിഡ് ബാധിച്ചാല് മുന്നൊരുക്കങ്ങള്ക്കായി ആരോഗ്യ വകുപ്പ് സര്ജ് പ്ലാനും ചികിത്സാ മാര്ഗരേഖയും തയാറാക്കിയതായി ആരോഗ്യ മന്ത്രി വീണ ജോര്ജ് അറിയിച്ചു. കൊവിഡും കൊവിഡാനന്തര പ്രശ്നങ്ങള്ക്കുമുള്ള ചികിത്സാ മാര്ഗരേഖയാണ് പുറത്തിറക്കിയത്. ഒന്നും രണ്ടും തരംഗത്തില് കുട്ടികളെ രോഗം കാര്യമായി ബാധിച്ചില്ല. മൂന്നാം തരംഗത്തിലും വലുതായി ബാധിക്കാന് സാധ്യത കുറവാണ്. എങ്കിലും ആശങ്ക നിലനില്ക്കുന്നുണ്ട്. കുട്ടികള്ക്ക് വാക്സിന് നല്കിയിട്ടുമില്ല. സ്കൂള് തുറക്കുന്ന സാഹചര്യമുണ്ടായാല് രോഗം വര്ധിക്കാന് സാധ്യതയുണ്ട്. ഈ പശ്ചാത്തലത്തിലാണ് സര്ജ് പ്ലാനും ചികിത്സാ മാര്ഗരേഖയും തയാറാക്കിയതെന്നും മന്ത്രി വ്യക്തമാക്കി.
നേരിയ (മൈല്ഡ്), മിതമായ (മോഡറേറ്റ്), ഗുരുതര (സിവിയര്) രോഗം എന്നിങ്ങനെ മൂന്ന് വിഭാഗങ്ങളായി തിരിച്ചാണ് കുട്ടികള്ക്കുള്ള ചികിത്സ സജ്ജമാക്കുന്നത്. ലഘുവായ രോഗലക്ഷണമുള്ളവരെ പോലും ശിശുരോഗ വിദഗ്ധരുള്ള ആശുപത്രിയിലാണ് ചികിത്സിക്കേണ്ടത്. നേരിയ രോഗലക്ഷണമുള്ള കുട്ടികളെ വീട്ടില് തന്നെ ചികിത്സിക്കണം. മിതമായ രോഗലക്ഷണമുള്ളവരെ ഹൈ ഡിപ്പന്ഡന്സി യൂണിറ്റ് സൗകര്യവും ഓക്സിജന് നല്കാന് സൗകര്യവുമുള്ള ജില്ലാ, ജനറല് ആശുപത്രികളിലേക്കാണ് മാറ്റുന്നത്. ഗുരുതര രോഗലക്ഷണമുള്ളവരെ ടെറിഷ്യറി കെയര് ആശുപത്രി, മെഡിക്കല് കോളേജ് എന്നിവിടങ്ങളില് ചികിത്സിക്കും.
കൊവിഡാനന്തര പ്രശ്നങ്ങള് ചികിത്സിക്കുന്നതിനും മാര്ഗരേഖ തയാറാക്കിയിട്ടുണ്ട്. തുടര്ചികിത്സയ്ക്കാവശ്യമായ മാര്ഗനിര്ദേശങ്ങളും നല്കിയിട്ടുണ്ട്. ഗര്ഭസ്ഥ ശിശുവിന് അമ്മയില് നിന്ന് രോഗം പകരുമെന്നതിന് തെളിവില്ല. മുലപ്പാലില് നിന്ന് രോഗം പകരില്ല. കൈകള് സോപ്പുയോഗിച്ച് നന്നായി കഴുകിയ ശേഷമേ മുലപ്പാല് ഊട്ടാന് പാടുള്ളൂ. അമ്മയില് നിന്ന് വായുവിലൂടെ മാത്രമേ കുട്ടിക്ക് രോഗം പകരാന് സാധ്യതയുള്ളു. അതിനാല് മുലപ്പാല് ഊട്ടുന്ന സമയത്ത് അമ്മ എന് 95 മാസ്ക് ധരിക്കണം.
ജന്മഭൂമി ഓണ്ലൈന്