കോഴിക്കോട്: ഇന്ത്യക്ക് വേണ്ടി സാഫ് അണ്ടര്‍-19 ചാമ്പ്യന്‍ഷിപ്പ്് വിജയിച്ച മലയാളി പ്രതിരോധതാരം മുഹമ്മദ് റാഫി ഗോകുലം കേരള എഫ് സിയില്‍ ചേര്‍ന്നു.
മുവാറ്റുപുഴ സ്വദേശിയായ റാഫി, സാഫിനു പുറമെ എ ഫ് സി അണ്ടര്‍-19 ക്വാളിഫയിങ് റൗണ്ടിലും റഷ്യ, ടര്‍ക്കി, വനറ്റു, എന്നീ രാജ്യങ്ങളിലെ പ്രദര്‍ശന മത്സരങ്ങളിലും ഇന്ത്യന്‍ ജേഴ്‌സി അണിനിട്ടുണ്ട്.
ബെംഗളൂരു എഫ് സി അക്കാദമിയിലൂടെ വളര്‍ന്നു വന്ന റാഫി, ബെംഗളൂരു ക്ലബ്ബിന് വേണ്ടി സൂപ്പര്‍ ഡിവിഷനും വിജയിച്ചിട്ടുണ്ട്. കഴിഞ്ഞ വര്‍ഷം എം എ കോളേജ് കോതമംഗലത്തിനായി കേരള പ്രീമിയര്‍ ലീഗ് കളിച്ചിരുന്നു. ഒരു ഗോളും മാന്‍ ഓഫ് ദി മാച്ച് അവാര്‍ഡും നേടി.
ഗോകുലത്തിന്റെ ഭാഗമാകുവാന്‍ കഴിയുന്നതില്‍ വളരെയധികം സന്തോഷമുണ്ട്. നല്ല പ്രകടനം കാഴ്ചവയ്‌ക്കുമെന്ന്് മുഹമ്മദ് റാഫി പറഞ്ഞു.
വളര്‍ന്നു വരുന്ന മലയാളി കളിക്കാര്‍ക്ക് അവസരം ഒരുക്കുകയാണ് ഞങ്ങളുടെ ലക്ഷ്യമെന്നും റാഫി ഭാവി വാഗ്ദാനമാണെന്നും ഗോകുലം കേരള എഫ് സി പ്രസിഡന്റ് വി സി പ്രവീണ്‍ പറഞ്ഞു
