തിരുവനന്തപുരം: രമേഷ് പിഷാരടി താരപ്രചാരകനായെത്തിയ മണ്ഡലങ്ങളിലെല്ലാം കോണ്ഗ്രസ് സ്ഥാനാര്ത്ഥികള് പരാജയപ്പെട്ടെന്ന ട്രോളുമായി ഇടതു സഹയാത്രികനായ സംവിധായകന് എം.എ നിഷാദ്. സകല മണ്ഡലങ്ങളിലും ഓടിനടന്ന് സ്ഥാനാര്ത്ഥികളെ തോല്പ്പിക്കാന് പറ്റോ സക്കീര് ബായിക്ക് ..?- എന്നാണ് എം.എ നിഷാദ് ഫേസ്ബുക്കില് കുറിച്ചത്. വി.എസ്. ശിവകുമാര്, ശബരിനാഥന്, ധര്മ്മജന് ബോള്ഗാട്ടി, വി.ടി ബല്റാം തുടങ്ങിയവരുടെ പ്രചരണത്തിനു രമേഷ് പിഷാരടി എത്തിയ ചിത്രങ്ങള് സഹിതമായിരുന്നു പോസ്റ്റ്. രമേശ് ചെന്നിത്തല നടത്തിയ കേരളയാത്രയുടെ വേദിയിലും രമേഷ് പിഷാരടി പങ്കെടുത്തിരുന്നു.
ഇതിനു പിന്നാലെയാണ് പിഷാരടിയുടെ പിഞ്ചു കുഞ്ഞിനെ പോലും സൈബര് ആക്രമണത്തിന് ഇരയാക്കി സഖാക്കള് ഫേസ്ബുക്കില് രംഗത്തെത്തിയത്. സ്വന്തം കുഞ്ഞിനൊപ്പം മുകളിലേക്ക് നോക്കി ഇരിക്കുന്ന ഒരു ചിത്രം മുകള്രാജവംശക്കാരാ എന്ന ക്യാപ്ഷനോടെ പിഷാരടി ഫേസ്ബുക്കില് പോസ്റ്റ് ചെയ്തിരുന്നു. ഇതില് നിന്ന ആ കുഞ്ഞിന്റെ ചിത്രം മാത്രം വെട്ടിമാറ്റി രണ്ടു ദിവസമായി എയറില് കറങ്ങി നില്ക്കുന്ന പിഷാരടി താഴെ ഇറങ്ങുന്നതും കാത്ത് മുകളിലേക്ക് നോക്കി ഇരിക്കുന്ന കുഞ്ഞുവാവ എന്ന വരികളോടെ സിപിഎം സൈബര് ഗ്രൂപ്പുകളില് പ്രചരിപ്പിക്കുകയായിരുന്നു. ഇതിനെതിരേ സോഷ്യല്മീഡിയയില് ശക്തമായ വിമര്ശനമാണ് ഉയരുന്നത്.
