സണ്ണി വെയ്നും മഞ്ജു വാര്യരും പ്രധാന വേഷങ്ങളിലെത്തുന്ന ഹൊറര് ചിത്രം ചതുര്മുഖത്തിന്റെ ട്രെയിലര് പുറത്തുവിട്ടു. മഞ്ജു വാര്യരുടെ ഫേസ്ബുക്ക് പേജിലൂടെയാണ് ട്രെയിലര് റിലീസ് ചെയ്തിരിക്കുന്നത്. നവാഗതരായ രഞ്ജിത് കമല ശങ്കര്, സലില് വി എന്നിവര് ചേര്ന്ന് സംവിധാനം ചെയ്യന്ന ചതുര്മുഖം പ്രേക്ഷകര്ക്ക് ഒരു മികച്ച അനുഭവം തന്നെ ആയിരിക്കുമെന്നാണ് അണിയറ പ്രവര്ത്തകര് അവകാശപ്പെടുന്നത്. പുറത്തുവന്ന ട്രെയിലറും ഇത് ശരിവെയ്ക്കുന്നതാണ്.
ചിത്രം ഒരു മികച്ച അനുഭവം തന്നെയായിരിക്കുമെന്ന് ഉറപ്പ് നല്കുന്നതാണ് ട്രെയിലര്. മഞ്ജു വാര്യരുടെ കഥാപാത്രത്തിന്റെ വിവാഹ കാര്യങ്ങളെക്കുറിച്ചുള്ള സംസാരത്തില് നിന്നാണ് ട്രെയില് തുടങ്ങുന്നത്. തുടര്ന്ന് ചിത്രത്തിന്റെ മൂഡ് മാറുകയും ഭയപ്പെടുത്തുകയും ത്രസിപ്പിക്കുകയും ചെയ്യുന്നുണ്ട്. കഥയിലും അവതരണ മികവിലും വളരെ സങ്കീര്ണ്ണതകളും, കൗതുകവും നിറഞ്ഞ ആശയം കൈകാര്യം ചെയ്യുന്ന ചതുര് മുഖം മലയാള സിനിമയിലെ ആദ്യത്തെ ടെക്നോ- ഹൊറര് സിനിമയാണ്. ഏപ്രില് എട്ടിന് ചിത്രം തിയേറ്ററുകളില് എത്തും.
അഭയകുമാര് കെ, അനില് കുര്യന് എന്നിവരാണ് ഏറെ പ്രത്യേകതകള് ഉള്ള സിനിമയുടെ കഥയും തിരക്കഥയും സംഭാഷണവും. ശ്യാമ പ്രസാദ്, ശ്രീകാന്ത് മുരളി, ഷാജു ശ്രീധര്, കലാഭവന് പ്രജോദ്, അലന്സിയര്, ബാലാജി ശര്മ്മ, റോണി ഡേവിഡ്, നവാസ് വള്ളിക്കുന്ന്, ബാബു അന്നൂര്, നിരഞ്ജന അനൂപ്, ഉമ കെ.പി തുടങ്ങിയ പ്രമുഖ താരങ്ങളും അഭിനയിക്കുന്നു.
മഞ്ജു വാരിയര് പ്രൊഡക്ഷന്സ്, ജിസ് ടോംസ് മൂവീസ്സിന്റെ ബാനറില് ജിസ് ടോംസ്, ജെസ്റ്റിന് തോമസ് എന്നിവര് ചേര്ന്നു നിര്മിക്കുന്ന ഈ ചിത്രത്തിന്റെ ഛായാഗ്രഹണം അഭിനന്ദന് രാമാനുജം നിര്വ്വഹിക്കുന്നു. സംഗീതം- ഡൗന് വിന്സെന്റ്, എഡിറ്റര്- മനോജ് സി.എസ്.
