കൊല്ലം : സംസ്ഥാനത്തെ ഇടത് വലത് മുന്നണികള് കള്ളനും പോലീസും കളിക്കുകയാണെന്ന് കേന്ദ്രമന്ത്രി വി. മുരളീധരന്. കേരളത്തില് ഇതുവരെ ഭരണമാറ്റം എന്നത് കൊടിയുടെ നിറത്തില് മാത്രമാണ് മാറ്റം വന്നിട്ടുള്ളത്. ഇരുമുന്നണികളും പരസ്പരധാരണയിലാണ്. കൊല്ലം അഞ്ചാലുംമൂട്ടില് നടന്ന തെരഞ്ഞെടുപ്പ് പൊതുസമ്മേളനത്തില് സംസാരിക്കുകയായിരുന്നു അദ്ദേഹം.
ഇരു മുന്നണികളും ഭരണത്തില് ഏറുമ്പോള് ഉയര്ത്തിക്കാട്ടുന്ന കേസുകളില് പിന്നീട് നടപടികളൊന്നും സ്വീകരിക്കാറില്ല. സോളാര്, ബാര് കോഴ അടക്കമുള്ള അഴിമതി കേസുകള് കഴിഞ്ഞ തെരഞ്ഞെടുപ്പില് ഏറ്റവും കൂടുതല് ചര്ച്ച ചെയ്തവരാണ് സിപിഎം. എന്നാല് അവര് ഭരണത്തിലിരുന്ന അഞ്ച് വര്ഷകാലം ഈ കേസുകളില് ഒരു നടപടിയും ഉണ്ടായില്ല. ഈ കേസുകളിലെല്ലാം കള്ളനും പൊലീസും കളിക്കുകയാണ് ഇരു മുന്നണികളുമെന്നും കേന്ദ്രമന്ത്രി രൂക്ഷമായി വിമര്ശിച്ചു.
സംസ്ഥാനത്ത് ഇതുവരെ ഭരണമാറ്റമല്ല, കൊടിയുടെ നിറം മാത്രമാണ് മാറിയത്. സ്വര്ണ്ണ കടത്തില് എന്ത് ഉണ്ടായി എന്ന് ചോദിക്കുന്ന പിണറായി വിജയന് മറുപടി പറയേണ്ടത് സോളാര് കേസിലും, ബാര് കോഴ കേസിലും എന്ത് നടപടി എടുത്തു എന്നാണ്. സ്വര്ണ്ണകടത്തിനും, ഡോളര് കടത്തിനും ഇടത് സര്ക്കാര് ഒത്താശ ചെയ്തു. കേരളാ ഗവണ്മെന്റ് യുഎഇ കൗണ്സില് ജനറലിന് പ്രത്യേക സുരക്ഷ ഒരുക്കി നല്കി.
യുഎഇ കൗണ്സില് ജനറലിന് വഴി വിട്ട് കാര്യങ്ങള് ചെയ്ത് കൊടുത്താല് സിപിഎം നേതാക്കള്ക്ക് ഗുണമുണ്ടാകും എന്നതിനാല് ആണ് അദ്ദേഹത്തിന് പ്രത്യേകം നയതന്ത്ര പരിരക്ഷ നല്കിയത്. ഒളിച്ചുവെയ്ക്കാനായി ഒന്നുമില്ലെന്നാണ് സ്പീക്കര് ശ്രീരാമകൃഷ്ണന് പറയുന്നത്. എന്നിട്ട് എന്തുകൊണ്ടാണ് കസ്റ്റംസിന് മുന്നില് ഹാജരാകാത്തത്. അതിന് മറുപടി നല്കണമെന്നും വി. മുരളീധരന് ചോദിച്ചു.
