കാസര്ഗോഡ്: അമേരിക്കന് കമ്പനിക്ക് കേരളത്തിന്റെ ആഴക്കടലില് മത്സ്യബന്ധനത്തിന് രഹസ്യ അനുമതി നല്കി മത്സ്യതൊഴിലാളികളെ ഒറ്റു കൊടുത്ത ചതിയനാണ് കേരളാ മുഖ്യമന്ത്രി പിണറായി വിജയനെന്ന് കേന്ദ്ര വിദേശകാര്യ പാര്ലമെന്ററി കാര്യ സഹമന്ത്രി വി. മുരളീധരന് പറഞ്ഞു. ലാവ്ലിന് മുതല് തുടങ്ങിയ പിണറായി വിജയന്റെ അഴിമതി ഏറ്റവും ദരിദ്ര്യരായ ജനവിഭാഗമായ മത്സ്യതൊഴിലാളികളെ വഞ്ചിക്കുന്നതില് എത്തി നില്ക്കുന്നു. ഇം.എം.സി.സി കമ്പനിക്ക് കേരളത്തിലെ ആഴക്കടലില് മത്സ്യ ബന്ധനം നടത്താന് കരാര് ഒപ്പിട്ടതിന്റെ കൂടുതല് വിവരങ്ങളാണ് പുറത്ത് വരുന്നത്. കേരളം പ്രളയത്തില് മുങ്ങി എറ്റവും വലിയ പ്രതിസന്ധിയിലായ ഘട്ടത്തില് രക്ഷാ പ്രവര്ത്തനത്തിന് മുന്നിട്ടിറങ്ങിയത് മത്സ്യതൊഴിലാളികളായിരുന്നു. അവര്ക്ക് ദിവസ വേതനം നിശ്ചയിച്ച മുഖ്യമന്ത്രിയോട് സഹജീവികളോടുള്ള കരുണ കാണിക്കാനാണ് രക്ഷാ പ്രവര്ത്തനത്തിന് ഇറങ്ങിയതെന്ന് പറഞ്ഞ് വേതനം വേണ്ടെന്ന് വച്ച നല്ല മനസ്സുള്ളവരാണ് മത്സ്യതൊഴിലാളികള്. കേരളത്തിന്റെ സൈന്യമെന്ന് മത്സ്യതൊഴിലാളികളെ വിശേഷിപ്പിച്ച മുഖ്യമന്ത്രി ആ സൈന്യത്തിന്റെ ചോറിലും കയ്യിട്ടുവാരുകയാണെന്ന് മന്ത്രി പറഞ്ഞു. ബി.ജെ.പി സംസ്ഥാന അദ്ധ്യക്ഷന് കെ.സുരേന്ദ്രന് നയിക്കുന്ന വിജയ യാത്രയുടെ ഉദ്ഘാടന ചടങ്ങില് സംസാരിക്കുകയായിരുന്നു മന്ത്രി.രാജ്യത്തെ മത്സ്യ സമ്പത്തിന് ഭീഷണി ഉണ്ടാകുമെന്ന് തിരിച്ചറിഞ്ഞാണ് കേന്ദ്ര സര്ക്കാര് വിദേശ ട്രോളറുകള്ക്ക് അനുമതി നല്കാതിരുന്നത്. അമേരിക്കന് കമ്പനിക്ക് മത്സ്യ ബന്ധനത്തിന് അനുമതി നല്കിയാല് മാത്രമേ അഴിമതി നടത്താന് കഴിയൂ എന്നു മനസ്സിലാക്കിയാണ് പിണറായി സര്ക്കാര് വളഞ്ഞ വഴിയിലൂടെ ഇതിന് ശ്രമിച്ചത്.
അഴിമതിക്കാരെയും കൊള്ളക്കാരെയും തുറന്ന് കാണിക്കാന് വിജയ യാത്ര വഴിയൊരുക്കുമെന്നും മന്ത്രി വി. മുരളീധരന് പറഞ്ഞു. കേരളത്തെ അഴിമതി മുക്തമാക്കാനാണ് ശ്രീരാമന്റെ ജന്മഭൂമിയില് നിന്ന് ഉത്തര്പ്രദേശ് മുഖ്യമന്ത്രി യോഗി ആദിത്യനാഥ് വിജയ യാത്രയില് പങ്കെടുക്കാനെത്തിയതെന്നും മന്ത്രി കൂട്ടി ചേര്ത്തു.
