തിരുവനന്തപുരം: വീട്ടിലെ വൈദ്യുതി ബന്ധം വിച്ഛേദിച്ചതിൽ പ്രതിഷേധിച്ച് ആത്മഹത്യക്ക് ശ്രമിച്ചയാൾ മരിച്ചു. നെയ്യാറ്റിൻകര പെരുങ്കടവിള സ്വദേശി സനിലാണ് മരിച്ചത്. ഇന്നലെ വൈകുന്നേരമാണ് സനില് മണ്ണെണ്ണ ഒഴിച്ച് തീകൊളുത്തിയത്. തിരുവനന്തപുരം മെഡിക്കല് കോളേജ് ആശുപത്രിയില് പുലര്ച്ചെയാണ് മരിച്ചത്.
ബിൽ കുടിശിക ഉണ്ടായിരുന്നതിനാൽ സനലിന്റെ വീട്ടിലെ വൈദ്യുതി വിച്ഛേദിക്കാൻ കെഎസ്ഇബി അധികൃതർ ഇന്നലെ എത്തിയിരുന്നു. എന്നാൽ സനൽ വീട്ടിൽ ഇല്ലായിരുന്നതിനാൽ ഇന്ന് പണം അടയ്ക്കാമെന്ന് അദ്ദേഹത്തിന്റെ ഭാര്യ അറിയിച്ചു. ഇതേ തുടർന്ന് ഉദ്യോഗസ്ഥർ തിരിച്ചുപോയി. എന്നാൽ ഗ്രാമപഞ്ചായത്ത് പ്രസിഡന്റിന്റെ ഇടപെടല് കാരണം കെഎസ്ഇബി വൈദ്യുതി വിച്ഛേദിക്കുകയായിരുന്നുവെന്നാണ് ആരോപണം.
പഞ്ചായത്ത് തെരെഞ്ഞെടുപ്പിൽ വിമത സ്ഥാനാർത്ഥിയായിരുന്നു സനിൽ. ഇവിടെ നിന്നും സിപിഎമ്മിനു വേണ്ടി മത്സരിച്ച് ജയിച്ച സുരേന്ദ്രനാണ് നിലവില് പ്രസിഡന്റ്. ആശുപത്രിയില് വച്ചാണ് സനില് പഞ്ചായത്ത് പ്രസിഡന്റിനെതിരെ ആരോപണം ഉന്നയിച്ചത്. താൻ മത്സരിച്ചതിലെ പ്രതികാരമാണ് വൈദ്യുതി ബന്ധം വിച്ഛേദിച്ചതിന് പിന്നിലെന്നായിരുന്നു സനിലിന്റെ ആരോപണം. എന്നാല് മാസങ്ങളുടെ വൈദ്യുതി കുടിശ്ശികയുണ്ടെന്ന് കെഎസ്ഇബി പറഞ്ഞു.
ലോക്ഡൗണ് ഇളവ് വന്നതിനുശേഷം കുടിശ്ശിക അടക്കാനുള്ള ഉപഭോക്താക്കള്ക്ക് നോട്ടീസ് നല്കി വൈദ്യുതി ബന്ധം വിഛേദിക്കുന്നത് പതിവാണെന്നും അത്തരത്തില് കഴിഞ്ഞദിവസം പ്രദേശത്ത് പത്തിലധികം വീടുകളില് വൈദ്യുതിബന്ധം വിച്ഛേദിച്ചു എന്നും കെഎസ്ഇബി അധികൃതരും വ്യക്തമാക്കി.
