മുംബൈ: പൊളിറ്റിക്കല് ത്രില്ലറില് മുന് പ്രധാനമന്ത്രി ഇന്ദിരാഗാന്ധിയുടെ വേഷം കങ്കണ റാവത്ത് അവതരിപ്പിക്കും. പേരിട്ടിട്ടില്ലാത്ത ചിത്രം ഒരു ബയോപിക് അല്ലെന്നും നിരവധി പ്രമുഖ അഭിനേതാക്കള് ഈ പദ്ധതിയുടെ ഭാഗമാകുമെന്നും താരം വ്യക്തമാക്കി.
‘അതെ, ഞങ്ങള് പ്രോജക്റ്റില് പ്രവര്ത്തിക്കുകയാണ്, തിരക്കഥ അവസാന ഘട്ടത്തിലാണ്. ഇന്ദിരാഗാന്ധിയുടെ ജീവചരിത്രമല്ല, അതൊരു മഹത്തായ കാലഘട്ട ചിത്രമാണ്, കൃത്യമായി പറഞ്ഞാല് ഈ രാഷ്ട്രീയ ചിത്രം ഇപ്പോഴത്തെ തലമുറയെ അക്കാലത്തെ ഇന്ത്യന് രാഷ്ട്രീയം മനസിലാക്കാന് സഹായിക്കുമെന്ന് കങ്കണ ഓഫീസ് പുറത്തിറക്കിയ പ്രസ്താവനയില് പറഞ്ഞു.
നിരവധി പ്രമുഖ അഭിനേതാക്കള് ഈ ചിത്രത്തിന്റെ ഭാഗമാകും, തീര്ച്ചയായും ഇന്ത്യന് രാഷ്ട്രീയ ചരിത്രത്തിലെ മികച്ച നേതാവായി അഭിനയിക്കാന് താന് ആഗ്രഹിക്കുന്നു. സഞ്ജയ് ഗാന്ധി, രാജീവ് ഗാന്ധി, മൊറാജി ദേശായി, ലാല് ബഹാദൂര് ശാസ്ത്രി തുടങ്ങിയ പ്രമുഖരെ വിവിധ അഭിനേതാക്കള് അവതരിപ്പിക്കും. ഏതാണ് എന്ന് വ്യക്തമാക്കിയിട്ടില്ലെങ്കിലും ചിത്രം ഒരു പുസ്തകത്തെ അടിസ്ഥാനമാക്കിയുള്ളതാണെന്നും കങ്കണ കൂട്ടിച്ചേര്ത്തു.
റിവോള്വര് റാണിയില് നേരത്തെ കങ്കണയ്ക്കൊപ്പം പ്രവര്ത്തിച്ച സംവിധായകന് സായ് കബീര് കഥയും തിരക്കഥയും രചിക്കും, കൂടാതെ പദ്ധതിയും സംവിധാനം ചെയ്യും.
