തൊടുപുഴ: ഇരു വൃക്കകളും തകരാറിലായതിനെ തുടര്ന്ന് ജീവിതം വഴിമുട്ടിയ അപര്ണാ ദാസിന് സഹായവുമായി സുമനസുകള്.മണക്കാട് വടക്കേയില് ഹരിദാസിന്റെ മകള് അപര്ണാ ദാസാ(21) ണ് ചികിത്സാ ചെലവ് കണ്ടെത്താനാവാതെ വിഷമിച്ചത്. ഓട്ടോറിക്ഷാ ഡ്രൈവറായ ദാസിന്റെ പരിമിത വരുമാനത്തില് നിന്നും ചികിത്സാ ചെലവ് കണ്ടെത്തുവാന് ഈ കുടുബത്തിന് കഴിയില്ല.
അപര്ണയുടെ ദുരിതജീവിതം പത്ര – സമൂഹ മാധ്യമങ്ങള് ഏറ്റെടുത്തതോടെ അപര്ണയെ തേടി സഹായങ്ങള് പ്രവഹിക്കുകയാണ്. കഴിഞ്ഞ സെപ്റ്റംബറിലാണ് വൃക്കകളുടെ തകരാര് പരിശോധനയിലൂടെ തിരിച്ചറിഞ്ഞത്. നിലവില് കോലഞ്ചേരി മെഡിക്കല് മിഷന് ആശുപത്രിയിലാണ് ചികിത്സ തുടരുന്നത്.
വൃക്ക മാറ്റിവെയ്ക്കല് ചികിത്സയ്ക്കായി കൂടുതല് സൗകര്യങ്ങളുള്ള ആശുപത്രിയിലേക്ക് മാറേണ്ടി വരും. ഡയാലിസിസ് നടത്തിയാണ് ജീവന് നിലനിര്ത്തുന്നത്. അപര്ണയുടെ ദു:ഖം സ്വന്തം ദുഃഖമായി കണ്ട് കരുണ വറ്റാത്ത മനസുകള് സഹായം എത്തിച്ചു കൊണ്ടിരിക്കുകയാണ്. ഇന്നലെ വൈകിട്ട് 6 മണി വരെ ഉദ്ദേശം 10 ലക്ഷത്തോളം രൂപ ചികിത്സാ സഹായമായി ലഭിച്ചു കഴിഞ്ഞു.
തുടര് ചികിത്സക്ക് ആവശ്യമായ പണം ഉദാരമതികള് നല്കും എന്ന ഉറച്ച വിശ്വാസത്തിലാണ് കുടുബാംഗങ്ങള്. അനുയോജ്യമായ വൃക്ക കണ്ടെത്തണം എന്ന കടമ്പയാണ് ഇനി മുന്നിലുള്ളത്. അതും വിജയിച്ചാല് കൈവിട്ട ജീവിതത്തിലേക്ക് തിരികെ പതുക്കെ നടന്നു കയറും അപര്ണ .
