തിരുവന്തപുരം : ഇന്ത്യയില് കോവിഡ് വാക്സിന്റെ ഡ്രൈ റണ് ആരംഭിക്കുമെന്ന ആരോഗ്യമന്ത്രാലയത്തിന്റെ പ്രഖ്യാപനത്തിനു പിന്നാലെ കേരളത്തില് നാല് ജില്ലകളില് നാളെ ട്രയല് നടത്തും. ജനുവരി രണ്ട് മുതല് രാജ്യത്തെ കോവിഡ് വാക്സിന് ഡ്രൈറണ് നടത്താമെന്ന് കേന്ദ്ര ആരോഗ്യ മന്ത്രാലയ ഉന്നതതല വൃത്തങ്ങള് യോഗത്തിന് ശേഷം അറിയിച്ചിരുന്നു.
രാജ്യത്തെ രണ്ടാമത്തെ ഡ്രൈ റണ് ആണിത്. ഡിസംബര് 28, 29 തീയതികളില് ആസാം, ആന്ധ്രാപ്രദേശ്, പഞ്ചാബ്, ഗുജറാത്ത് എന്നീ സംസ്ഥാനങ്ങളില് നേരത്തെ ഡ്രൈറണ് നടത്തിയിരുന്നു. കേരളത്തില് തിരുവനന്തപുരം, വയനാട്, പാലക്കാട്, ഇടുക്കി ജില്ലകളിലാണ് ശനിയാഴ്ച ഡ്രൈ റണ് നടത്തുക. സംസ്ഥാനത്ത് ഡ്രൈറണ്ണിനായി വോളന്റിയര്മാരേയും സജ്ജരാക്കിയിട്ടുണ്ട്.
സാങ്കേതികതയുടെ സഹായത്തോടെ കോവിഡ് വാക്സിന് വിതരണ സംവിധാനം സജ്ജമാക്കല്, വിവരങ്ങള് ശേഖരിക്കല്, ജില്ലകളില് വാക്സിനുകള് സ്വീകരിക്കുന്നതും വാക്സിനേഷന് അനുവദിക്കുന്നതുമായി ബന്ധപ്പെട്ട കാര്യങ്ങള്, വാക്സിനേഷന് ടീമിനെ വിന്യസിക്കല്, സെഷന് സൈറ്റില് സാധനങ്ങള് എത്തിക്കല്, വാക്സിനേഷന് നടത്തുന്നതിന്റെ മോക്ക് ഡ്രില്, ബ്ലോക്ക്- ജില്ല- സംസ്ഥാന തല യോഗങ്ങളിലെ റിപ്പോര്ട്ടിങ്, അവലോകനം എന്നിവയെല്ലാം ഡ്രൈ റണ്ണില് ഉള്പ്പെടുന്നു.
രാജ്യമെമ്പാടും 96,000 വാക്സിനേറ്റര്മാരെയാണ് ഇതിനായി തയാറാക്കി നിര്ത്തിയിരിക്കുന്നത്. ഓരോ സംസ്ഥാനത്തും ചുരുങ്ങിയത് മൂന്നു സ്ഥലങ്ങളിലെങ്കിലും ഡ്രൈ റണ് നടത്തണമെന്നാണ് തീരുമാനം. ഓരോ കേന്ദ്രത്തിലും 25 ആരോഗ്യപ്രവര്ത്തകര് വീതം ഡമ്മി കോവിഡ് വാക്സിന് സ്വീകരിക്കുന്ന പ്രക്രിയയാണിത്. യഥാര്ത്ഥ വാക്സിന് ഡ്രൈവ് ആരംഭിക്കുമ്പോള് ഉണ്ടായേക്കാവുന്ന ന്യൂനതകള് കണ്ടെത്താനുള്ള മാര്ഗം കൂടിയാണിത്.
