നീതിപീഠത്തിന്റെ വിധി കാത്ത് സിസ്റ്റര്‍ അഭയയുടെ ആത്മാവ്

കുറവിലങ്ങാട് (കോട്ടയം): സിസ്റ്റര്‍ അഭയ കേസില്‍ തിരുവനന്തപുരം സിബിഐ കോടതിയില്‍ പ്രതിഭാഗവും പ്രോസിക്യൂഷന്‍ വാദവും പൂര്‍ത്തിയായി. സിബിഐ കോടതി ജഡ്ജി കെ. സനല്‍കുമാര്‍ 22ന് വിധി പറയും.  

കഴിഞ്ഞ വര്‍ഷം ആഗസ്റ്റ് 26നാണ് അഭയ കേസിന്റെ വിചാരണ സിബിഐ കോടതിയില്‍ ആരംഭിച്ചത്. പ്രോസിക്യൂഷന്‍ സാക്ഷികളായി 49 പേരെയാണ് കോടതിയില്‍ വിസ്തരിച്ചത്. പ്രതിഭാഗം സാക്ഷികളായി ഒരാളെ പോലും വിസ്തരിക്കാന്‍ പ്രതിഭാഗത്തിന് സാധിച്ചില്ല. 2008 നവംബര്‍ 18നാണ് പ്രതികളെ സിബിഐ അറസ്റ്റ് ചെയ്തത്. 2009 ജൂലൈ 17നാണ് പ്രതികള്‍ക്കെതിരെ സിബിഐ കുറ്റപത്രം സമര്‍പ്പിച്ചു. ഫാ. തോമസ് കോട്ടൂര്‍, സിസ്റ്റര്‍ സെഫി എന്നിവര്‍ക്കെതിരായ വിചാരണയിലാണ് കോടതി 22ന് വിധി പറയുന്നത്. രണ്ടാം പ്രതി ഫാ. ജോസ് പൂതൃക്കയിലിനെ വിചാരണ കൂടാതെ വെറുതെ വിട്ടതിനെതിരെ സിബിഐ സുപ്രീംകോടതിയില്‍ അപ്പീല്‍ ഉടന്‍ നല്‍കുമെന്ന് പ്രോസിക്യൂട്ടര്‍ കോടതിയെ അറിയിച്ചു. പ്രോസിക്യൂഷന്‍ രണ്ടാം സാക്ഷി സഞ്ചു പി. മാത്യു കൂറുമാറിയതിനെതിരെ ക്രിമിനല്‍ കേസ് ഉടന്‍ കോടതയില്‍ ഫയല്‍ ചെയ്യുമെന്നും പ്രോസിക്യൂട്ടര്‍ അറിയിച്ചു.  

1992 മാര്‍ച്ച് 27നാണ് സിസ്റ്റര്‍ അഭയ ദുരൂഹ സാഹചര്യത്തില്‍ കൊല്ലപ്പെട്ടത്. നീണ്ട 28 വര്‍ഷങ്ങള്‍ക്ക് ശേഷമാണ് സിബിഐ കോടതി വിധി പറയുക. ഉഴവൂര്‍ അരീക്കര ഐക്കരക്കുന്നേല്‍ എം. തോമസിന്റെ മകളായി 1973ല്‍ ആയിരുന്നു അഭയയുടെ ജനനം. കോട്ടയം ബിസിഎം കോളേജില്‍ രണ്ടാം വര്‍ഷ പ്രീഡിഗ്രി വിദ്യാര്‍ത്ഥിനി ആയിരിക്കെ 1992 മാര്‍ച്ച് 27ന് കോട്ടയം ക്നാനായ കത്തോലിക്ക രൂപതയുടെ കീഴിലുള്ള സെന്റ് പയസ് ടെന്‍ത് കോണ്‍വെന്റ് കിണറ്റില്‍ മരിച്ച നിലയില്‍ കണ്ടെത്തുകയായിരുന്നു.