തുറവൂര്: ജപ്പാന് ശുദ്ധജല കുടിവെള്ള പദ്ധതിയുടെ പ്രധാന പൈപ്പില് ചോര്ച്ച കണ്ടെത്തി. തുറവൂര്-പന്പാ പാതയില തൈക്കാട്ടുശേരി പാലത്തിന്റെ പടിഞ്ഞാറെക്കരയില് അപ്രോച്ച് റോഡിന് അടിയിലൂടെ കടന്നുപോകുന്ന വലിയ പൈപ്പിലാണ് ചോര്ച്ച കണ്ടെത്തിയിരിക്കുന്നത്.
ജപ്പാന്ജല പദ്ധതിയിലെ മാക്കേക്കടവിലെ ജലസംഭരണിയില് നിന്നും തുറവൂരിലെ സംഭരണിയിലേയ്ക്ക് വെള്ളം എത്തുന്നതു ഈ പൈപ്പിലൂടെയാണ്. മുമ്പ് ഇവിടെ സ്ഥിരമായി പൈപ്പ് പൊട്ടിയതിനെ തുടര്ന്ന് ഇരുമ്പുപൈപ്പ് സ്ഥാപിച്ചിരുന്നു. കടക്കരപ്പള്ളി മുതല് അരൂര് പഞ്ചായത്ത് വരെയുള്ള മേഖലയിലേക്ക് കുടിവെള്ളം എത്തിക്കുന്നത് ഈ പൈപ്പുലൈന് വഴിയാണ്.
39,000ത്തിലധികം ഗാര്ഹിക കണക്ഷനുകളും 2263 ഓളം പൊതുടാപ്പുകളും മേഖലയില് ഉണ്ട്.അതേ സമയം മേഖലയില് യഥേഷ്ടം കുടിവെള്ളം ലഭിക്കാത്ത സാഹചര്യത്തില് പമ്പിങിന്റെ തോത് വര്ധിപ്പിക്കാന് ജല അഥോറിറ്റി അധികൃതര് ആലോചിക്കുമ്പോഴാണ് ചോര്ച്ച ശ്രദ്ധയില് പെട്ടത്. ഇപ്പോള് രണ്ടുമോട്ടോറുകള് ഉപയോഗിച്ചാണ് പമ്പിങ് നടത്തുന്നത്.
