ചാലക്കുടി: നഗരത്തിലെ കടകളില് വ്യാപക മോഷണം. അഞ്ച് വ്യാപാര സ്ഥാപനങ്ങളാണ് കുത്തി തുറന്നത്. ചാലക്കുടി മാര്ക്കറ്റിലെ ഒകെ റോഡില് പ്രവര്ത്തിക്കുന്ന കോട്ടണ് വേള്ഡ്, ആലപ്പാട്ട് ഹാര്ഡ് വെയര്, കൃഷ്ണ കൂള്ഡ്രിങ്ങ്സ്, കോപ്ടെക്സ് ടെക്സ്റ്റൈയില്സ്, മിസ്റ്റര് ബട്ലര് ബേക്കറി എന്നിവിടങ്ങളിലാണ് മോഷണം നടന്നത്. എല്ലാ കടകളുടെയും പൂട്ടുകള് പൊളിച്ചാണ് മോഷ്ടാക്കള് അകത്ത് കടന്നത്. കോട്ടണ് വേള്ഡ് തുണിക്കടയില് നിന്ന് 25000 രൂപയുടെ വസ്ത്രങ്ങളും 700 രൂപയും മോഷണം പോയതായി പറയുന്നു. മറ്റു കടകളിലെ നഷ്ടം കണക്കാക്കിയിട്ടില്ല.
ദേശീയ പണിമുടക്കിന്റെ മറവില് കഴിഞ്ഞ ദിവസം അര്ധരാത്രിയിലായിരുന്നു മോഷണം. മേഖലയിലെ പല വ്യാപാര സ്ഥാപങ്ങളിലും നിരീക്ഷണ ക്യാമറകള് ഇല്ലാത്തത് മോഷ്ടാക്കള്ക്ക് സഹായമാകുന്നുണ്ട്. ചാലക്കുടി പോലീസ് കേസ് എടുത്ത് അന്വേഷണം ആരംഭിച്ചു. മേഖലയില് മോഷണം വ്യാപകമായിട്ടും പ്രതികളെ പിടിക്കാത്തത് പോലീസിന്റെ വീഴ്ചയാണെന്നും രാത്രി പട്രോളിങ് കൂടുതല് ശക്തമാക്കണമെന്നും വ്യാപാരികള് പറയുന്നു.
