മുംബൈ : അധോലോക കുറ്റവാളി രവിപൂജാരിക്ക് എല്ലാവിധ സുരക്ഷയും ഏര്പ്പെടുത്താന് മുംബൈ പോലീസിന് നിര്ദ്ദേശം നല്കി കര്ണ്ണാടക ഹൈക്കോടതി. കേസ് അന്വേഷണത്തിന്റെ ഭാഗമായി മുംബൈ പോലീസിന് കസ്റ്റഡിയില് വിട്ടതിനെതിരെ രവി പൂജാരി നല്കിയ ഹര്ജി പരിഗണിക്കവേയാണ് ഹൈക്കോടതി സുരക്ഷ ഏര്പ്പെടുത്താനായി നിര്ദ്ദേശം നല്കിയത്.
നിലവില് ബെംഗളൂരു പോലീസിന്റെ കസ്റ്റഡിയില് കഴിയുന്ന രവി പൂജാരിയെ 10 ദിവസത്തേയ്ക്കാണ് മുംബൈ പോലീസിന്റെ കസ്റ്റഡിയില് വിട്ടു നല്കിയിരിക്കുന്നത്. അതേസമയം മുംബൈ പോലീസിനു കൈമാറുന്നത് തന്റെ ജീവന് തന്നെ ഭീഷണിയാണെന്നും അതിനാല് കസ്റ്റഡിയില് വിട്ടുകൊണ്ടുള്ള അനുമതി റദ്ദാക്കണം, മുംബൈ പോലീസ് ബെംഗളൂരുവിലെത്തി അന്വേഷണം നടത്തുന്നതായിരിക്കും ഉചിതമെന്നുംരവി പൂജാരി ആവശ്യപ്പെട്ടു.
എന്നാല് ഈ ആവശ്യങ്ങള് നിരസിച്ച കോടതി രവി പൂജാരിയെ മഹാരാഷ്ട്രയിലേക്ക് കൊണ്ടുപോവുകയാണെങ്കില് എല്ലാവിധ സുരക്ഷയും ഉറപ്പുവരുത്തണമെന്ന് നിര്ദ്ദേശം നല്കി. ചോദ്യം ചെയ്യലിനായി കൊണ്ടുപോയി 10 ദിവസത്തിനകം തിരിച്ച് എത്തിക്കണമെന്നും കര്ണ്ണാടക ഹൈക്കോടതി അറിയിച്ചു.
