ദുബായ്: ടീമിലേക്ക് തിരിച്ചെത്തിയ വിക്കറ്റ് കീപ്പര്‍ ബാറ്റ്‌സ്മാന്‍ വൃദ്ധിമാന്‍ സാഹയുടെ വെടിക്കെട്ട് ബാറ്റിങ്ങില്‍ ദല്‍ഹി ക്യാപിറ്റല്‍സിനെതിരെ സണ്‍റൈസേഴ്‌സ് ഹൈദരാബാദിന് കൂറ്റന്‍ സ്‌കോര്‍. ആദ്യം ബാറ്റ് ചെയ്ത ഹൈദരാബാദ് ഇരുപതോവറില്‍ രണ്ട് വിക്കറ്റ് നഷ്ടത്തില്‍ 219 റണ്‍സ് നേടി.
ജോണി ബെയര്‍സ്‌റ്റോക്ക് പകരം ടീമിലെത്തിയ സാഹ ആദ്യ വിക്കറ്റില്‍ നായകന്‍ ഡേവിഡ് വാര്‍ണര്‍ക്കൊപ്പം 107 റണ്‍സ് നേടി. തകര്‍ത്തടിച്ച വാര്‍ണര്‍ 34 പന്തില്‍ 66 റണ്‍സ് എടുത്തു. പത്താം ഓവറില്‍ അശ്വിന്റെ പന്തില്‍ വാര്‍ണര്‍ പുറത്തായെങ്കിലും മനീഷ് പാണ്ഡെയെ കൂട്ടുപിടിച്ച് സാഹ റണ്‍സ് വാരിക്കൂട്ടി. പതിനഞ്ചാം ഓവറില്‍ ആന്റച്ച് നോര്‍ക്കെയുടെ പന്തില്‍ സാഹ പുറത്താകുമ്പോള്‍ ഹൈദരാബാദ് സ്‌കോര്‍ 170. സാഹ 45 പന്തില്‍ 12 ഫോറും രണ്ട് സിക്‌സും ഉള്‍പ്പെടെ 87 റണ്‍സ്. മനീഷ് പാണ്ഡെ 31 പന്തില്‍ 44 റണ്‍സ് നേടി പുറത്താകാതെനിന്നു. വില്യംസണ്‍ 11 റണ്‍സ് എടുത്തു. കഗീസോ റബാഡ നാലോവറില്‍ വിക്കറ്റില്ലാതെ 54 റണ്‍സ് വഴങ്ങി.
ജന്മഭൂമി ഓണ്‍ലൈന്‍