ന്യൂദല്ഹി: രാജ്യത്ത് കൊവിഡ് ചികിത്സയിലുള്ളവരുടെ എണ്ണം രണ്ടാം ദിവസവും കുറയുന്നു. രോഗികളുടെ എണ്ണം 7.5 ലക്ഷത്തില് താഴെ നില്ക്കുന്നത് കേന്ദ്രആരോഗ്യമന്ത്രാലയത്തെ ആശ്വാസത്തിലാക്കി. പതിനാലു സംസ്ഥാനങ്ങളിലെ മരണനിരക്ക് ഒരുശതമാനത്തില് താഴേക്ക് എത്തിയതും നേട്ടമായി.
കഴിഞ്ഞ 24 മണിക്കൂറിനുള്ളില് രാജ്യത്ത് 61,775 പേരാണ് കൊവിഡ് രോഗമുക്തരായത്. അതേസമയം പുതുതായി രോഗം സ്ഥിരീകരിച്ചത് 54,044 പേര്ക്ക് മാത്രമാണ്. രാജ്യത്ത് കഴിഞ്ഞ 24 മണിക്കൂറിനുള്ളില് 10.83 ലക്ഷം കൊവിഡ് ടെസ്റ്റുകള് നടത്തി.
സമയബന്ധിതവും ഫലപ്രദവുമായ ചികിത്സയ്ക്കൊപ്പം ടെസ്റ്റ്, ട്രാക്ക്, ട്രീറ്റ് നയം വിജയകരമായി നടപ്പാക്കുന്നതാണ് മരണനിരക്ക് കുറച്ചതെന്ന് കേന്ദ്ര ആരോഗ്യമന്ത്രാലയം അഭിപ്രായപ്പെട്ടു. ദേശീയതലത്തില് കൊവിഡ് മരണനിരക്ക് ഇന്നലെ 1.51 ശതമാനമായി കുറഞ്ഞിട്ടുണ്ട്. ആകെ കൊവിഡ് രോഗമുക്തര് 67,95,103 ആണ്. രോഗമുക്തി നിരക്ക് 89 ശതമാനത്തോടടുക്കുന്നു. രോഗമുക്തരുടെ 77 ശതമാനവും 10 സംസ്ഥാനങ്ങളില് ആണ്. രോഗമുക്തരായവരില് 8500 പേര് കര്ണാടകത്തില് നിന്നാണ്. മഹാരാഷ്ട്രയിലും കേരളത്തിലും 7,000 ത്തിലധികം പേര് രോഗമുക്തരായി.
24 മണിക്കൂറിനുള്ളില് 54,044 പേര്ക്കാണ് രാജ്യത്ത് പുതുതായി രോഗം സ്ഥിരീകരിച്ചത്. ഇതില് 78 ശതമാനവും 10 സംസ്ഥാനങ്ങളിലാണ്. മഹാരാഷ്ട്രയിലും കേരളത്തിലും 8,000ത്തിലധികം പേരും കര്ണാടകത്തിലല് 6,000ത്തിലധികം പേരും രോഗബാധിതരായി. 24 മണിക്കൂറിനുള്ളില് 717 പേരാണ് മരിച്ചത്. മുപ്പതു ശതമാനം മരണങ്ങളും മഹാരാഷ്ട്രയിലാണ്.
