കൊച്ചി : സ്വര്ണക്കടത്ത് കേസില് മുഖ്യമന്ത്രിയുടെ മുന് പ്രിന്സിപ്പല് സെക്രട്ടറി എം. ശിവശങ്കറിനെ എന്ഐഎ സംഘം വീണ്ടും ചോദ്യം ചെയ്യുന്നു. ഇത് മൂന്നാം തവണയാണ് എന്ഐഎ ചോദ്യം ചെയ്യുന്നത്. ഡിപ്ലോമാറ്റിക് ബാഗേജ് വഴിയുള്ള സ്വര്ണക്കടത്ത് കേസിലെ മുഖ്യ പ്രതികളില് ഒരാളായ സ്വപ്ന സുരേഷ് കഴിഞ്ഞ രണ്ടു ദിവസമായി എന്ഐഎ കസ്റ്റഡിയിലാണ്. ഇതിന്റെ അടിസ്ഥാനത്തിലാണ് ശിവശങ്കറിനെ അന്വേഷണ സംഘം ചോദ്യം ചെയ്യുന്നത്.
ഇരുവരേയും ഒരുമിച്ചിരുത്തി എന്ഐഎ സംഘം ചോദ്യം ചെയ്തേക്കും. സ്വപ്ന സുരേഷ്, സന്ദീപ് എന്നിവരില് നിന്നുള്ള ഡിജിറ്റല് തെളിവുകള് അന്വേഷണ സംഘം കണ്ടെത്തിയിരുന്നു. ഇതിന്റെ അടിസ്ഥാനത്തില് സ്വപ്നയെയും മറ്റു പ്രതികളെയും അന്വേഷണ സംഘം വീണ്ടും ചോദ്യം ചെയ്തു വരികയാണ്.
ചോദ്യം ചെയ്യലിനായി ശിവശങ്കര് കൊച്ചിയിലെ എന്ഐഎ ഓഫീസില് ഇന്ന രാവിലെ തന്നെ എത്തിയിരുന്നു. കേസില് ശിവശങ്കറിന്റെ പങ്ക് വ്യക്തമാക്കുന്ന തെളിവുകള് എന്ഐഎ സംഘത്തിന് ലഭിച്ചിട്ടുണ്ടെന്നാണ് സൂചന. സ്വപ്നയുടെ മൊബൈല് ഫോണ്, ലാപ്ടോപ്പ് എന്നിവയില് നിന്നുള്ള കൂടുതല് തെളിവുകള് അന്വേഷണ സംഘം ശേഖരിച്ചിട്ടുണ്ട്.
നിലവില് സ്വപ്ന സുരേഷും കേസിലെ മറ്റുപ്രതികളുമായി ശിവശങ്കറിനുള്ള ബന്ധമാണ് അന്വേഷണ സംഘം പരിശോധിക്കുന്നത്. അതായത് കള്ളക്കടത്ത് സംഘത്തിന് ഏതെങ്കിലും തരത്തിലുള്ള സഹായം ശിവശങ്കര് ചെയ്തു കൊടുത്തിട്ടുണ്ടോ എന്നും അന്വേഷണ സംഘം വിശദമായി പരിശോധിക്കുകയാണ്. എന്നാല് സ്വപ്ന സുരേഷുമായി വ്യക്തിപരമായ ബന്ധം മാത്രമാണ് ഉള്ളതെന്നാണ് ശിവശങ്കര് നല്കിയ മൊഴി. ഡിജിറ്റല് തെളിവുകളില് നിന്ന് ഇതിന് വിരുദ്ധമായ ചില കാര്യങ്ങള് അന്വേഷണ സംഘം കണ്ടെത്തിയതായാണ് സൂചന.
