തൃശൂര്: പിണറായി സര്ക്കാര് പാവങ്ങളുടെ പിച്ചച്ചട്ടിയില് കൈയിട്ടു വാരുന്നുവെന്ന് ബിജെപി സംസ്ഥാന വക്താവ് അഡ്വ. ബി.ഗോപാലകൃഷ്ണന്. ലൈഫ്മിഷന് ഫ്ളാറ്റ് വിവാദം സിബിഐ അന്വേഷിക്കുക, എ.സി മൊയ്തീനും സ്വപ്ന സുരേഷും തമ്മിലുള്ള ഇടപാട് എന്ഐഎയുടെ അന്വേഷണപരിധിയില് കൊണ്ടുവരുക തുടങ്ങിയ ആവശ്യങ്ങള് ഉന്നയിച്ച് യുവമോര്ച്ച വടക്കാഞ്ചേരി നിയോജകമണ്ഡലം കമ്മിറ്റി സംഘടിപ്പിച്ച പ്രതിഷേധ ധര്ണ്ണ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. പാവങ്ങളുടെ പേരു പറഞ്ഞ് അധികാരത്തില് വന്നവര് തന്നെയാണ് നിര്ധന വിഭാഗത്തിനു വേണ്ടി നിര്മിക്കുന്ന പദ്ധതിയില് കോടികളുടെ അഴിമതി നടത്തിയതെന്നും അദ്ദേഹം ആരോപിച്ചു.
വിഷയത്തില് അനില് അക്കര എംഎല്എയുടെ ഇടപെടല് വില കുറഞ്ഞ രാഷ്ട്രീയ മുതലെടുപ്പ് മാത്രമാണ്. സ്വന്തം മണ്ഡലത്തില് നടന്ന വന് അഴിമതിയാരോപണമുള്ള പദ്ധതിയെക്കുറിച്ച് ഉത്തരവാദിത്വമുള്ള ജനപ്രതിനിധി എന്ന നിലക്ക് ഇത്ര കാലമായും അദ്ദേഹം അറിഞ്ഞില്ലെന്ന് പറയുന്നത് ലജ്ജാവഹമാണെന്നും ഗോപാലകൃഷ്ണന് പറഞ്ഞു.നഗരസഭ ഓഫീസിനു മുന്നില് നടന്ന സമരത്തില് യുവമോര്ച്ച വടക്കാഞ്ചേരി നിയോജകമണ്ഡലം പ്രസിഡന്റ് എ.എ അനില്കുമാര് അധ്യക്ഷത വഹിച്ചു. ബിജെപി നിയോജകമണ്ഡലം പ്രസിഡന്റ് വിനയകുമാര്, ജനറല് സെക്രട്ടറി എസ്.രാജു, വിജീഷ് കെ.വി, അഖില് പള്ളിമണ്ണ, ചന്ദ്രമോഹന് കുമ്പളങ്ങാട്, ബിജീഷ് അടാട്ട്, എം.ആര് അനില്കുമാര്, അമൃതമുരളീധരന്, കാവ്യസുരേഷ് എന്നിവര് നേതൃത്വം നല്കി.
