കോഴിക്കോട് : സംസ്ഥാന തെരഞ്ഞെടുപ്പില്‍ മുസ്ലിം ലീഗിനെ പി.കെ. കുഞ്ഞാലിക്കുട്ടി നയിക്കും. കുറച്ചു കാലമായി സംസ്ഥാന രാഷ്‌ട്രീയത്തില്‍ നിന്ന് മാറി നില്‍ക്കുന്ന കുഞ്ഞാലിക്കുട്ടിയുടെ തിരിച്ചുവരവ് കൂടിയാണ് ഇത്. സംസ്ഥാനത്തെ തെരഞ്ഞെടുപ്പ് ചുമതല കുഞ്ഞാലിക്കുട്ടിയെ ഏല്‍പ്പിച്ചതായി മുസ്ലിം ലീഗ് ഉന്നതാധികാര സമിതി യോഗത്തിന് ശേഷം പാണക്കാട് ശിഹാബ് അലി തങ്ങളാണ് ഇക്കാര്യം അറിയിച്ചത്.
ഇ.ടി. മുഹമ്മദ് ബഷീറിനാണ് ദേശീയ തെരഞ്ഞെടുപ്പിന്റെ ചുമതല. കുഞ്ഞാലിക്കുട്ടിക്ക് തെരഞ്ഞെടുപ്പിന്റെ ചുമതല നല്‍കിയപ്പോഴൊക്കെ മുസ്ലിം ലീഗിന് വിജയിക്കാനായിട്ടുണ്ട്. അതിനാലാണ് ഇപ്പോള്‍ ഇത് ഏല്‍പ്പിക്കുന്നതെന്നും ശിഹാബ് അലി തങ്ങള്‍ അറിയിച്ചു. അതേസമയം നിയമസഭാ തെരഞ്ഞെടുപ്പില്‍ കുഞ്ഞാലിക്കുട്ടി മത്സരിക്കുമോയെന്ന് വ്യക്തമല്ല.
വരാന്‍ പോകുന്നത് തെരഞ്ഞെടുപ്പുകളുടെ ഒരു ഘോഷയാത്രയാണെന്നും വലിയ വെല്ലുവിളിയാണ് നേരിടാനുള്ളത്. നടന്നുകൊണ്ടിരിക്കുന്ന ഭരണം കേരളത്തിന് വലിയ മോശമായ സ്ഥിതിയാണുണ്ടാക്കുന്നത്. ഒരു ഗുണവും ചെയ്യുന്നില്ലെന്നും പ്രഖ്യാപനത്തിന് ശേഷം കുഞ്ഞാലിക്കുട്ടി പ്രതികരിച്ചു.
