പത്തനംതിട്ട : കൊറോണ വൈറസ് രോഗബാധിതയായ യുവതിയെ ആംബുലന്സ് ഡ്രൈവര് പീഡിപ്പിച്ചതായി പരാതി. ആറന്മുളയിലാണ് സംഭവം. രോഗബാധിതയായ യുവതിയെ കൊറോണ ഫസ്റ്റ് ലൈന് ട്രീറ്റ്മെന്റ് സെന്ററിലേക്ക് കൊണ്ടുപോകുന്നതിന് ഇടെയാണ് പീഡനത്തിന് ഇരയായത്.
ആളൊഴിഞ്ഞ സ്ഥലത്തെത്തിയപ്പോള് ആംബുലന്സ് നിര്ത്തി ഇയാള് യുവതിയെ പീഡനത്തിനിരയാക്കുകയായിരുന്നു. ആംബുലന്സ് ഡ്രൈവറായ കായംകുളം കീരിക്കാട് സ്വദേശി നൗഫലിനെ(29) പോലീസ് അറസ്റ്റ് ചെയ്തു. വധശ്രമക്കേസിലടക്കം നൗഫല് പ്രതിയാണ്.
കോഴഞ്ചേരിയില് നിന്ന് യുവതിയെ വിദഗ്ധ ചികില്സയ്ക്ക് കൊണ്ടു പോകുമ്പോഴായിരുന്നു സംഭവം. പീഡനത്തിനിരയായ പെണ്കുട്ടിക്കൊപ്പം മറ്റൊരു യുവതിയും ആംബുലന്സിലുണ്ടായിരുന്നു. ഈ യുവതിയെ കോഴഞ്ചേരിയിലെ ആശുപത്രിയില് ചികില്സയ്ക്ക് പ്രവേശിപ്പിച്ച ശേഷമാണ് രോഗവാസ്ഥ കൂടുതലുള്ള യുവതിയെ വിദഗ്ധ ചികില്സയ്ക്ക് അയയ്ക്കുകയായിരുന്ന. ഈ യാത്രയില് യുവതിയും ഡ്രൈവറും മാത്രമേ ഉണ്ടായിരുന്നുള്ളൂ.
ചികിത്സാ കേന്ദ്രത്തിലെത്തിയ പെണ്കുട്ടി തനിക്ക് നേരിട്ട ദുരവസ്ഥയെ കുറിച്ച് അധികൃതരെ അറിയിക്കുകയായിരുന്നു. ഇതോടെ പോലീസെത്തി കേസുടുത്തു. പ്രാഥമിക ചികില്സയും നല്കിയ പെണ്കുട്ടി ഇപ്പോഴും ക്വാറന്റീനിലാണ്. പെണ്കുട്ടിയെ ആരോഗ്യ പരിശോധനയ്ക്ക് വിധേയമാക്കും.
