കണ്ണൂര്‍: കണ്ണൂര്‍ കതിരൂരില്‍ സിപിഎം കേന്ദ്രത്തില്‍ ബോംബ് നിര്‍മാണത്തിനിടെ വന്‍സ്‌ഫോടനം. കതിരൂരിലെ പൊന്ന്യത്തെ സിപിഎം കേന്ദ്രത്തില്‍ ആണ് ബോംബ് സ്‌ഫോടനം ഉണ്ടായത്. സ്‌ഫോടനത്തില്‍ നിരവധി സിപിഎമ്മുകാര്‍ക്ക് പരിക്കേറ്റു.. രണ്ടു പേരുടെ അതീവ നില ഗുരുതരമാണെന്നും സൂചനയുണ്ട്. നിരവധി സിപിഎമ്മുകാര്‍ ബോംബ് നിര്‍മാണ കേന്ദ്രത്തില്‍ ബോംബ് നിര്‍മാക്കാനുണ്ടായിരുന്നെന്നാണ് റിപ്പോര്‍ട്ട്. പരിക്കേറ്റ ആളുകളെ സി.പി.എം നിയന്ത്രണത്തിലുള്ള സഹകരണ ആശുപത്രിയിലേക്ക് മാറ്റി. സംഭവസ്ഥലത്തു നിന്നും നിരവധി ബോംബുകളും കണ്ടെടുത്തിട്ടുണ്ട്.
സ്‌ഫോടനത്തില്‍ ഗുരുതരമായി പരിക്കേറ്റ രണ്ടുപേരെ തലശ്ശേരി സഹകരണ ആശുപത്രിയിലേക്ക് മാറ്റിയിട്ടുണ്ട്. ഇരുവരുടെയും കൈകള്‍ക്കും കണ്ണുകള്‍ക്കുമാണ് പരിക്ക്. സ്റ്റീല്‍ ബോംബുകളാണ് പൊട്ടിയത്. തലശ്ശേരി ഡിവൈഎസ്പി അടങ്ങുന്ന സംഘം സംഭവസ്ഥലത്തെത്തിയിട്ടുണ്ട്. കഴിഞ്ഞ ദിവസം തിരുവനന്തപുരത്തും നിര്‍മ്മാണത്തിനിടെ ബോംബ് പൊട്ടി സിപിഎം പ്രവര്‍ത്തകന് പരിക്കേറ്റിരുന്നു. വെഞ്ഞാറമ്മൂട്ടില്‍ രണ്ടു ഡിവൈഎഫ്‌ഐക്കാര്‍ കൊല്ലപ്പെട്ടതിനു പിന്നാലെ സംസ്ഥാനത്ത് വ്യാപകമായി അക്രമത്തിന് സിപിഎം തയാറെടുക്കുന്നെന്ന് ആരോപണമുണ്ടായിരുന്നു.
