തിരുവനന്തപുരം: ബിജെപി പട്ടികജാതി മോര്ച്ചയുടെ ആഭിമുഖ്യത്തില് മഹാത്മാ അയ്യന്കാളിയുടെ ജയന്തി ആഘോഷം ജനന ദിവസമായ ആഗസ്റ്റ് 28 മുതല് ജന്മ നക്ഷത്ര ദിനമായ സപ്തംബര് ഒന്നു വരെ നടത്തുമെന്ന് ബിജെപി പട്ടികജാതി മോര്ച്ച സംസ്ഥാന പ്രസിഡന്റ് ഷാജുമോന് വട്ടേക്കാട് അറിയിച്ചു. ആഘോഷ പരിപാടികളുടെ സംസ്ഥാനതല ഉദ്ഘാടനം 28ന് രാവിലെ ഒമ്പതിന് ബിജെപി സംസ്ഥാന പ്രസിഡന്റ് കെ. സുരേന്ദ്രന് വെങ്ങാനൂരില് നിര്വഹിക്കും. 28ന് ജില്ലാ കേന്ദ്രങ്ങളിലും. 29, 30 തിയതികളില് നിയോജകമണ്ഡലം, പഞ്ചായത്ത് കേന്ദ്രങ്ങളിലും, 31, സപ്തംബര് ഒന്ന് തീയതികളില് യൂണിറ്റ് തലങ്ങളിലും അയ്യന്കാളി ജയന്തി സംഘടിപ്പിക്കും.
പട്ടികജാതി കോളനികള് കേന്ദ്രീകരിച്ച് സ്വച്ഛ് ഭാരത്, വിവിധ മേഖലകളില് പ്രാഗത്ഭ്യം തെളിയിച്ചവര്ക്ക് ആദരവ്, വിദ്യാഭ്യാസ അവാര്ഡ് ദാനം, ഭക്ഷ്യധാന്യകിറ്റ് വിതരണം തുടങ്ങി വിവിധ സേവന സന്നദ്ധ പ്രവര്ത്തനങ്ങള് നടത്തും. കേന്ദ്ര സര്ക്കാരിന്റെ വിവിധ പദ്ധതികളില് അംഗങ്ങളാക്കല് തുടങ്ങിയ വിവിധ പരിപാടികള് ഇത്തവണ സംഘടിപ്പിച്ചിട്ടുള്ളതായി സംസ്ഥാന പ്രസിഡന്റ് ഷാജുമോന് വട്ടേക്കാട് അറിയിച്ചു. ബിജെപിയുടെയും മോര്ച്ചയുടെയും സംസ്ഥാന ദേശീയ നേതാക്കള് വിവിധ പരിപാടികളില് പങ്കെടുക്കും.
