കായംകുളം: കായംകുളത്ത് നടുറോഡില് യുവാവിനെ വെട്ടിക്കൊന്നു. കായംകുളം എംഎസ്എം സ്കൂളിന് സമീപം വൈദ്യന് വീട്ടില് സിയാദാണ് (35) മരിച്ചത്. ചൊവ്വാഴ്ച രാത്രി 10 മണിയോടെ ഫയര് സ്റ്റേഷന് സമീപമുള്ള റോഡിലായിരുന്നു സംഭവം. കുത്തേറ്റ് വീണ ഇയാളെ ഉടന് തന്നെ കായംകുളം താലുക്ക് ആശുപത്രിയില് എത്തിച്ചെങ്കിലും രക്ഷിക്കാനായില്ല. കരളിന് ആഴത്തില് ഏറ്റ മുറിവാണ് മരണകാരണമെന്ന് ആശുപത്രി അധികൃതര് പറഞ്ഞു.
നിരവധി ക്രിമിനല് കേസുകളില് പ്രതിയായ കായംകുളം സ്വദേശി മുജീബാണ് കൊലപാതകം നടത്തിയതെന്ന് പോലീസ് പറയുന്നു. പ്രതികള്ക്കായി പോലീസ് അന്വേഷണം തുടങ്ങി.സിപിഎം എംഎസ്എം ബ്രാഞ്ച് കമ്മിറ്റി അംഗവും ഡിവൈഎഫ്ഐ പ്രവര്ത്തകനും കൂടിയായ സിയാദിന്റെ കൊലപാതകത്തില് പ്രതിഷേധിച്ച് സിപിഎം കായംകുളം നഗരസഭ പരിധിയില് ഹര്ത്താല് നടത്തി. സംഭവത്തില് മുജീബിന്റെ കൂട്ടാളിയായ ഒരാളെ പിടികൂടി.
