കൊല്ലം: മിനിട്സ് തിരുത്തിയ സംഭവത്തില് ലക്ഷങ്ങളുടെ അഴിമതി എന്ന് ആരോപണം ഉയരുന്നു. ഉപാസന ആശുപത്രിക്ക് എതിര്വശത്ത് കോര്പ്പറേഷന് ഏറ്റൊടുത്ത 1.37 ഏക്കര് സ്ഥലം ചുറ്റുമതില് കെട്ടുന്നത് സംബന്ധിച്ചുള്ള അജണ്ട ജൂണ് 22ന് കൗണ്സില് ഏകകണ്ഠമായി പാസാക്കിയതിന് പിന്നാലെ മിനിട്സില് തിരുത്തല് വരുത്തി എന്നാണ് ആരോപണം. കോര്പ്പറേഷന് സെക്രട്ടറിയുടെ നേര്ക്കാണ് ആരോപണം ഉയരുന്നതെങ്കിലും കുന്തമുന നീളുന്നത് മറ്റ് പലരിലേക്കുമാണ്.
കഴിഞ്ഞ കോര്പ്പറേഷന് കൗണ്സില് യോഗത്തില് ഇതേ ചൊല്ലി സിപിഎം-സിപിഐ കൗണ്സിലര്മാര് ഏറ്റുമുട്ടല് ഉണ്ടായിരുന്നു. ഇതിന് പിന്നില് പ്രവര്ത്തിച്ചവര്ക്ക് 25 ലക്ഷം രൂപ ലഭിച്ചെന്ന ആരോപണമാണ് ഉയരുന്നത്. മിനിട്സ് തിരുത്തിയിട്ടില്ലെന്ന് മേയര് കഴിഞ്ഞ കൗണ്സിലില് ആവര്ത്തിച്ചു. എന്നാല് സിപിഎമ്മുമായി ഇടേശേഷം ഇതിന് പിന്നില് പ്രവര്ത്തിച്ച ഉദ്യോഗസ്ഥരെ പുറത്തു കൊണ്ടുവരും എന്ന് വെല്ലുവിളിക്കുകയായിരുന്നു. കൗണ്സില് യോഗത്തില് 129 വര്ക്കുകള് ആണ് പാസാക്കിയത്. ഇതില് 7 എണ്ണത്തിന് ജില്ലാ പ്ലാനിംഗ് കൗണ്സില് അംഗീകാരം നല്കിയില്ല.
അതില് കോര്പ്പറേഷന് ഭൂമിയുടെ സംരക്ഷണമതില് നിര്മിക്കുന്ന പദ്ധതിയുമുണ്ട്. അതിനാലാണ് ചുറ്റുമതില് നിര്മാണത്തിന്റെ അജണ്ട പാസാക്കാത്തതെന്ന നിലപാടാണ് മേയര്ക്ക്. അജണ്ട വായിച്ചപ്പോള് തന്നെ ഇത് മാറ്റിവയ്ക്കണമെന്ന് താന് ആവശ്യപ്പെടതായാണ് മേയര് പറയുന്നത്. എന്നാല് അംഗങ്ങള് കൗണ്സില് യോഗത്തില് വേണ്ടത്ര ജാഗ്രത പാലിക്കാതെയാണ് ഇരുന്നത്.
പലരും ഫോണില് നോക്കി ഇരിക്കുന്നത് കൊണ്ടാണ് ഇത് അറിയാതെ പോയതെന്നും മോയര് ഹണി ബഞ്ചമിന് പറയുന്നു. ഇതിനെ ഖണ്ഡിച്ച് മുന് മേയര് അഡ്വ. വി. രാജേന്ദ്രബാബു രംഗത്ത് വന്നിരുന്നു. കോര്പ്പറേഷന് സെക്രട്ടറി പറഞ്ഞത് ഏകകണ്ഠമായി പാസാക്കി എന്നാണ് അദ്ദേഹത്തിന്റെ വാദം, പിന്നെ എങ്ങനെ മിനിട്സ് തിരുത്തിയെന്നും മുന് മേയര് ചോദിക്കുന്നു.
