അയോധ്യയില് രാമക്ഷേത്രത്തിന് തറക്കല്ലിടുന്ന വേളയില് രാമക്ഷേത്രത്തിനായി പരിശ്രമിച്ചവരേയും രാമഭക്തരേയും ഞാന് അഭിനന്ദിക്കുന്നു.
ക്ഷേത്രത്തിന്റെ തറക്കല്ലിടല് ചരിത്ര സംഭവമാണ്. രാജ്യത്തെ ജനങ്ങള് പതിറ്റാണ്ടുകളായി കാത്തിരുന്ന മുഹൂര്ത്തം സമാഗതമായിരിക്കുകയാണ്. എല്ലാവരും വികാരാധീനരാണ്. ഈ ചരിത്രസംഭവത്തിന് സാക്ഷികളാകുന്നുവെന്ന കാര്യം ചിലര്ക്ക് വിശ്വസിക്കാന് പോലും കഴിഞ്ഞിട്ടില്ല. പൊളിക്കുകയും പുനര്നിര്മിക്കുകയും ചെയ്യുന്ന ആവര്ത്തന ചക്രത്തില് നിന്ന് രാമഭജന്മഭൂമി ഇപ്പോള് മോചിതമായി. താത്ക്കാലിക ക്ഷേത്രത്തില് നിന്ന് രാംലല്ല മോചിതനാവുന്നു. ഇനി മഹത്തായ രാമ ക്ഷേത്രം നിര്മിക്കപ്പെടും.
സ്വാതന്ത്ര്യലബ്ധിക്കായുള്ള ജനങ്ങളുടെ ത്യാഗത്തിന് ഓഗസ്റ്റ് 15 ഫലം കണ്ടു. അതുപോലെ ഈ ദിവസം രാമക്ഷേത്രത്തിനായുള്ള തലമുറകള് നീണ്ട അര്പ്പണ ബോധത്തെയും നിരന്തര പോരാട്ടത്തെയുമാണ് ഓര്മിപ്പിക്കുന്നത്. രാമ ക്ഷേത്രമെന്ന സ്വപ്നം ഫലവത്താകുന്നതിന് പോരാട്ടം നടത്തിയവരെ ഈ അവസരത്തില് ഞാന് സ്മരിക്കുകയും അവര്ക്ക് പ്രണാമം അര്പ്പിക്കുകയും ചെയ്യുന്നു. ശ്രീരാമന്റെ നിലനില്പ്പിനെ ചോദ്യം ചെയ്യാനും അദ്ദേഹത്തെ ചരിത്രത്തില് നിന്ന് ഇല്ലാതാക്കാനുമുള്ള നിരവധി ശ്രമങ്ങള് നടന്നെങ്കിലും അദ്ദേഹം നമ്മുടെ സംസ്കാരത്തിന്റെ അടിത്തറയായി തുടരുകയാണ്. രാമക്ഷേത്രം നമ്മുടെ സംസ്കാരത്തിന്റെയും ശാശ്വത വിശ്വാസത്തിന്റെയും ദേശീയ ബോധത്തിന്റെയും മനോധൈര്യത്തിന്റെയും അടുത്ത തലമുറകളെ പ്രചോദിപ്പിക്കുന്ന ആധുനിക മാതൃകയാണ്.
രാമക്ഷേത്രം ഈ പ്രദേശത്തിന്റെ മുഖച്ഛായതന്നെ മാറ്റിമറിക്കും. ലോകത്താകമാനമുള്ള കോടിക്കണക്കിന് രാമഭക്തര് അയോധ്യയിലേക്ക് എത്തുന്നതിനെക്കുറിച്ച് ആലോചിച്ചു നോക്കൂ. വികാരങ്ങള്ക്കപ്പുറം സുപ്രീം കോടതി വിധിയോട് മാന്യതയോടും അന്തസോടും കൂടി പ്രതികരിക്കുകയും ഇപ്പോഴും പ്രതികരിച്ചുകൊണ്ടിരിക്കുകയും ചെയ്യുന്ന ജനങ്ങളെ ഞാന് അഭിനന്ദിക്കുന്നു.
ശ്രീരാമ വിജയം, ശ്രീകൃഷ്ണന് ഗോവര്ധനെ രക്ഷിച്ചത്, ഛത്രപതി ശിവജി സ്വരാജ് സ്ഥാപിച്ചത്, ഗാന്ധിജി സ്വാതന്ത്ര്യ സമരം നയിച്ചത് തുടങ്ങിയ കാര്യങ്ങളില് ദരിദ്രര്, പിന്നാക്കവിഭാഗം, ദളിത്, ഗോത്ര വിഭാഗം എന്നിവര്ക്ക് നിര്ണായക പങ്കുണ്ടായിരുന്നു. അതുപോലെ തന്നെ രാമക്ഷേത്ര നിര്മാണവും സാധാരണക്കാരുടെ സഹകരണത്തോടെയും പങ്കാളിത്തത്തോടെയുമാണ് നടക്കുന്നത്.
രാമന് എല്ലായ്പ്പോഴും സത്യത്തിനായി നിലകൊണ്ടിരുന്ന വ്യക്തിയായിരുന്നു. അദ്ദേഹം സാമൂഹ്യ ഐക്യം ഉയര്ത്തിപ്പിടിച്ചിരുന്നു. പ്രജകളെ തുല്യമായി പരിഗണിച്ചിരുന്നപ്പോഴും അദ്ദേഹത്തിന് പാവങ്ങളോടും സഹായം ആവശ്യമുള്ളവരോടും പ്രത്യേക കരുണയുണ്ടായിരുന്നു. ജീവിതത്തിന്റെ എല്ലാ ഘട്ടങ്ങളിലും രാമന്റെ പ്രചോദനം ഉണ്ടാകും. സംസ്കാരം, തത്വചിന്ത, വിശ്വാസം, രാജ്യത്തിന്റെ പാരമ്പര്യം എന്നീ കാര്യങ്ങളിലെല്ലാം അദ്ദേഹത്തിന്റെ സ്വാധീനം പ്രകടമാണ്. പ്രാചീനകാലത്ത് വാല്മീകി രാമായണത്തിലൂടെയും മധ്യകാലഘട്ടത്തില് തുളസീദാസ്, കബീര്, ഗുരുനാനാക്ക് എന്നിവരിലൂടെയും അഹിംസ, സത്യഗ്രഹം എന്നിവയ്ക്കുള്ള ശക്തിയായി മഹാത്മാഗാന്ധിയുടെ ഭജനുകളിലൂടെയും ജനങ്ങള്ക്കുള്ള മാതൃകയായി ശ്രീരാമന് എല്ലാക്കാലത്തും ഉണ്ടായിരുന്നു. ബുദ്ധന് ശ്രീരാമ ദര്ശനങ്ങള് ഉള്ക്കൊണ്ടിരുന്നു. ഒരുകാലത്ത് നൂറ്റാണ്ടുകളോളം അയോധ്യാ നഗരം ജൈനമത വിശ്വാസികളുടെ കേന്ദ്രമായിരുന്നു. രാജ്യത്ത് നാനാത്വത്തില് ഏകത്വം എന്ന ആശയം ശ്രീരാമനില് നിന്ന് പ്രചോദനം ഉള്കൊണ്ടതാണ്.
ശ്രീരാമന് വിവിധ രാജ്യങ്ങളില് ബഹുമാന്യനാണ്. മുസ്ലീം ഭൂരിപക്ഷ രാജ്യമായ ഇന്തോനേഷ്യ, കംബോഡിയ, തായ്ലന്ഡ്, ശ്രീലങ്ക, നേപ്പാള് എന്നീ രാജ്യങ്ങളില് രാമായണം സുപരിചിതമാണ്. ശ്രീരാമനെക്കുറിച്ചുള്ള പരാമര്ശങ്ങള് ഇറാന്, ചൈന എന്നീ രാജ്യങ്ങളിലുണ്ട്. രാമകഥകള് വിവിധ രാജ്യങ്ങളില് പ്രസിദ്ധമാണ്. രാമക്ഷേത്രത്തിന്റെ നിര്മാണം ആരംഭിച്ച വേളയില് ഈ രാജ്യങ്ങളിലെ ജനങ്ങളും സന്തോഷവാന്മാരാകും.
വരുന്ന നൂറ്റാണ്ടുകളില് മാനവരാശിയേയും മാനവികതേയും പ്രചോദിപ്പിക്കാന് രാമക്ഷേത്രത്തിന് കഴിയും. ശ്രീരാമന്റെ സന്ദേശങ്ങള്, രാമക്ഷേത്രം, നമ്മുടെ സമ്പന്നമായ ചരിത്രം എന്നിവയെക്കുറിച്ച് എല്ലാ രാജ്യങ്ങളും അറിയുന്നത് വളരെ പ്രധാനപ്പെട്ട കാര്യമാണ്. ഈ കാര്യം മനസ്സില് വെച്ച് കൊണ്ടാണ് രാജ്യത്ത് രാം സര്ക്യൂട്ടുകള് വികസിപ്പിക്കുന്നത്.
രാമരാജ്യത്തെക്കുറിച്ച് മഹാത്മാഗാന്ധിക്ക് വീക്ഷണങ്ങള് ഉണ്ടായിരുന്നു. ആരും ദരിദ്രരും അസന്തുഷ്ടരുമായി ഉണ്ടാകരുത്, പുരുഷനും സ്ത്രീയും തുല്യരായി സന്തുഷ്ടരായിരിക്കണം, കര്ഷകരും മൃഗപരിപാലകരും സന്തുഷ്ടരായിരിക്കണം, വൃദ്ധരും കുട്ടികളും ഡോക്ടര്മാരും എല്ലായ്പ്പോഴും സുരക്ഷിതരായിരിക്കണം, അഭയം തേടി വരുന്നവരെ സംരക്ഷിക്കുക എന്നത് എല്ലാവരുടേയും കടമയാണ്, പിറന്ന നാട് സ്വര്ഗത്തേക്കാള് മഹത്തരമാണ്, ശക്തമായ രാജ്യത്തിന് കൂടുതല് സമാധാന അന്തരീക്ഷം സൃഷ്ടിക്കാനാകും എന്നീ രാമന്റെ പാഠങ്ങള് രാജ്യത്തെ തുടര്ന്നും പ്രചോദിപ്പിക്കുകയും മുന്നോട്ട് നയിക്കുകയും ചെയ്യും. ശ്രീരാമന് മാറ്റങ്ങള്ക്കും ആധുനികതയ്ക്കും വേണ്ടി ഒരുപോലെ നിലകൊണ്ട വ്യക്തിയാണ്. രാമന്റെ ഈ ദര്ശനങ്ങള് ഉള്ക്കൊണ്ട് രാജ്യം പുരോഗതിയിലേക്ക് സഞ്ചരിക്കുകയാണ്. രാജ്യത്തെ ജനങ്ങളുടെ പരസ്പരസ്നേഹത്തിലും സാഹോദര്യത്തിലുമാണ് രാമക്ഷേത്രം നിര്മിക്കപ്പെടേണ്ടത്. ‘സബ്കാ സാത്ത്’, ‘സബ്കാ വിശ്വാസ്’ എന്നിവയിലൂടെ സ്വയം പര്യാപ്തമായ ഒരു ആത്മനിര്ഭര് ഭാരതത്തെ സൃഷ്്ടിക്കേണ്ടതുണ്ട്.
കാലതാമസമില്ലാതെ മുന്നോട്ട് പോകുക എന്ന ശ്രീരാമന്റെ സന്ദേശം ഊന്നിപ്പറഞ്ഞ ശ്രീ മോദി രാജ്യം ഇക്കാര്യം പാലിക്കേണ്ടതുണ്ട്. കോവിഡ് പശ്ചാത്തലത്തില് ശ്രീരാമന് പഠിപ്പിച്ച ‘മര്യാദ’യുടെ പ്രാധാന്യം വളരെ വലുതാണ്. നിലവിലെ സാഹചര്യം ഈ മര്യാദ പാലിക്കാന് നമ്മളോട് ആവശ്യപ്പെടുന്നു. ജനങ്ങള് തമ്മില് ആറടി അകലം പാലിക്കുകയും മാസ്കുകള് കൃത്യമായി വയ്ക്കുകയും ചെയ്യണം.
