ഉദുമ: പാലക്കുന്നിലും കോട്ടിക്കുളം തീരദേശമേഖലയിലും കോവിഡ് സമ്പര്ക്കവ്യാപനം ജനങ്ങളെ കടുത്ത ആശങ്കയിലാഴ്ത്തുന്നു. ജൂലായ് 24ന് പാലക്കുന്നിലെ ഒരു യുവാവിനും തുടര്ന്ന് വീട്ടിലെ അഞ്ചുപേര്ക്കും കോവിഡ് സ്ഥിരീകരിച്ചതോടെ പാലക്കുന്ന് കോവിഡ് ബാധിത പ്രദേശമാകുന്ന സാഹചര്യം നിലനില്ക്കുകയാണ്. 27ന് ഇതേ വാര്ഡില് രണ്ടുപേര്ക്ക് കൂടി കോവിഡ് പോസിറ്റീവായത് നാട്ടുകാരില് കടുത്ത ആശങ്ക സൃഷ്ടിച്ചിരുന്നു.
29ന് പാലക്കുന്ന് ടൗണിലെ പതിനേഴാം വാര്ഡില്പെട്ട ഒരു കടയിലെ ജീവനക്കാരനായ എട്ടാം വാര്ഡില് താമസിക്കുന്നയാള്ക്കും ആ കടയുടെ ഉടമയായ 16ാം വാര്ഡിലെ താമസക്കാരനും രോഗം സ്ഥിരീകരിച്ചു. കിഴക്കേ ടൗണിലെ മത്സ്യവില്പ്പനക്കാരിക്കും കോട്ടിക്കുളത്തെ 55കാരനും കോവിഡ് ബാധിച്ചിട്ടുണ്ട്. വെള്ളിയാഴ്ച ഒരു വ്യാപാരിക്കും രോഗം സ്ഥിരീകരിച്ചതോടെ കോട്ടിക്കുളം തീരദേശമേഖലയിലെ രോഗികളുടെ എണ്ണം നാലായി ഉയര്ന്നിട്ടുണ്ട്.
കാസര്കോട് ജില്ലയിലെ മിക്ക ഭാഗങ്ങളിലും കോവിഡ് വ്യാപിച്ചപ്പോഴും ഉദുമ പഞ്ചായത്തിലെ പാലക്കുന്നും പരിസരങ്ങളും സുരക്ഷിത മേഖലയായിരുന്നു. ഒരാഴ്ച മുമ്പുവരെ സമീപപ്രദേശങ്ങളിലെ കടകള് തുറക്കുന്നതിന് ജില്ലാ ഭരണകൂടം നിയന്ത്രണമേര്പ്പെടുത്തിയപ്പോള് അവശ്യസാധനങ്ങള് വാങ്ങുന്നതിനും മറ്റുമായി നിരവധി പേര് പാലക്കുന്നിനെയാണ് ആശ്രയിച്ചിരുന്നത്. ഈ അവസ്ഥയ്ക്കാണ് ഇപ്പോള് മാറ്റം വന്നിരിക്കുന്നത്.
നിരീക്ഷണത്തിലായിരുന്ന 18ാം വാര്ഡിലെ ഒരു യുവതിക്കും പോസിറ്റീവായതോടെ പാലക്കുന്നിലും പരിസരങ്ങളിലും താമസിക്കുന്നവര് അങ്കലാപ്പിലാണ്. കഴിഞ്ഞ ദിവസം കോട്ടിക്കുളത്ത് നടത്തിയ പരിശോധനയിലാണ് രോഗം സ്ഥിരീകരിച്ചത്. ഇവിടെ കൂടുതല് സമ്പര്ക്കരോഗികള് ഉണ്ടാകാമെന്നാണ് ആരോഗ്യവകുപ്പ് അധികൃതരുടെ വിലയിരുത്തല്. കോട്ടിക്കുളത്ത് കഴിഞ്ഞ ദിവസം കോവിഡ് സ്ഥിരീകരിക്കപ്പെട്ടവരുടെ സ്രവപരിശോധനക്കായി കൂടുതല് ക്യാമ്പുകള് നടത്തണമെന്ന് പഞ്ചായത്തംഗങ്ങളും ജാഗ്രതാസമിതികളും അധികൃതരോട് അഭ്യര്ത്ഥിച്ചിരിക്കുകയാണ്.
കോട്ടിക്കുളത്ത് 11 മത്സ്യതൊഴിലാളി സ്ത്രീകള്ക്ക് കോവിഡ്
ഉദുമ: ഉദുമ പഞ്ചായത്തില് ശനിയാഴ്ച 13 പേര്ക്കുകൂടി കോവിഡ് 19 സ്ഥിരീകരിച്ചു. ഇതില് 11 ഉം കോട്ടിക്കുളം തീരപ്രദേശത്ത്. 11 ഉം മത്സ്യതൊഴിലാളികള്. ഇപ്പോള് ചികിത്സയിലുള്ള മുന്ന് പേര് അടക്കം തീരദേശത്തു മാത്രം 14 പേര്ക്കാണ് കോവിഡ് ബാധിച്ചത്. രോഗം സ്ഥിരീകരിച്ചവരുമായി പ്രൈമറി കോണ്ടാക്ട് പട്ടികയിലുള്ളവര്ക്കുള്ള പരിശോധന തിങ്കളാഴ്ച ഉദുമ കുടുംബാരോഗ്യ കേന്ദ്രത്തില് നടത്തുന്നതാണെന്ന് ബന്ധപ്പെട്ടവര് അറിയിച്ചതായി പഞ്ചായത്ത് പ്രസിഡന്റ് കെ.എ.മുഹമ്മദലി അറിയിച്ചു. ചൊവ്വ, ബുധന് ദിവസങ്ങളില് കോവിഡ് പരിശോധന ക്യാമ്പ് നടത്തും. സ്ഥലം തീരുമാനിച്ചിട്ടില്ല. തീരദേശ മത്സ്യതൊഴിലാളി കുടുംബങ്ങള് അതീവ പരിഭ്രാന്തിയിലാണെന്നും വീടുവീടാന്തരം ബോധവല്ക്കരണ പ്രവര്ത്തനം സജീവമായി നടന്നു വരികയാണെന്നും വാര്ഡ് അംഗം ലക്ഷ്മി ബാലന് പറഞ്ഞു.
