മാവേലിക്കര: തീരദേശവാസികളെ സുരക്ഷിത സ്ഥാനങ്ങളില്‍ പുനരധിവസിപ്പിക്കുന്ന പുനര്‍ഗേഹം പദ്ധതിയുടെ നടത്തിപ്പുമായി ബന്ധപ്പെട്ട താല്‍ക്കാലിക നിയമനങ്ങള്‍ മാനദണ്ഡം മറികടന്നെന്ന് ആക്ഷേപം. വകുപ്പ് മന്ത്രിയുടെ കൊല്ലത്തെ ഓഫീസുമായി ബന്ധപ്പെട്ടുള്ള നിയമനങ്ങളില്‍ അഴിമതിയും സ്വജന പക്ഷപാതവും നടന്നതായാണ് സൂചന. വര്‍ഷങ്ങള്‍ പരിചയമുള്ള ഉദ്യോഗാര്‍ത്ഥികളെ മറികടന്നാണ് ഇഷ്ടക്കാരെ തിരുകി കയറ്റിയിരിക്കുന്നതെന്ന് ഉറപ്പിക്കുന്ന വിവരാവകാശ രേഖ ജന്മഭൂമിക്ക് ലഭിച്ചു.
ഒരു വര്‍ഷത്തേക്കാണ് താല്‍ക്കാലിക നിയമനം. പത്ത് തീരദേശ ജില്ലകളിലാണ് പദ്ധതി. പ്രോജക്ട് കോ-ഓര്‍ഡിനേറ്റര്‍, മോട്ടിവേറ്റര്‍ എന്നീ തസ്തികകളിലാണ് നിലവിലെ നിയമനം. ഇതില്‍ പ്രോജക്ട് കോ-ഓര്‍ഡിനേറ്ററുടെ നിയമനമാണ് പൂര്‍ത്തിയായത്. തിരുവനന്തപുരത്ത് സിപിഎം ബ്രാഞ്ച് സെക്രട്ടറിയായ അഭിഭാഷകനെയാണ് നിയമിച്ചത്. ഇയാള്‍ക്കെതിരെ ക്രിമിനല്‍കേസുകളടക്കം മുമ്പ് ഉണ്ടായിരുന്നു. കൊല്ലത്ത് സിപിഎം ഏരിയാ കമ്മിറ്റിയിലെ പ്രമുഖന്റെ മകള്‍ക്കാണ് നിയമനം. തസ്തികയ്‌ക്കു വേണ്ട യോഗ്യത പോലും ഇവര്‍ക്കില്ല. അഞ്ച് പേര്‍ അപേക്ഷ സമര്‍പ്പിച്ചിരുന്നതില്‍ ഒരാള്‍ക്കു മാത്രമാണ് നിര്‍ദ്ദിഷ്ട യോഗ്യത. ഈ വ്യക്തിയെ പിന്തള്ളിയാണ് മന്ത്രിയുടെ അടുത്തയാളെ പരിഗണിച്ചത്.
ആലപ്പുഴയിലും സമാന അവസ്ഥ. ഇവിടെ പാര്‍ട്ടി അനുഭാവിയുടെ മകള്‍ക്കാണ് നിയമനം ലഭിച്ചത്. ഇദ്ദേഹം കയര്‍ ഫെര്‍ഡിന്റെ ഉന്നത സ്ഥാനത്തിരുന്ന വ്യക്തിയായിരുന്നു. തൃശൂരില്‍ പ്രമുഖ പത്രത്തിലെ മുതിര്‍ന്ന റിപ്പോര്‍ട്ടറുടെ ഭാര്യയെയാണ് പരിഗണിച്ചത്. ഇതിന് സിപിഎം ജില്ലാ കമ്മിറ്റിയുടെ കത്തും മന്ത്രിയുടെ ഓഫീസിലെത്തി. കോഴിക്കോട്ട് മന്ത്രിയുടെ അഡിഷണല്‍ പ്രൈവറ്റ് സെക്രട്ടറിയുടെ അടുത്ത ബന്ധുവിനാണ് നിയമനം. ഇയാള്‍ മേഖലയിലെ ഡിവൈഎഫ്ഐ നേതാവാണ്. മറ്റൊരു ഉദ്യോഗാര്‍ത്ഥിക്കായി തയാറാക്കിയ നിയമന ഉത്തരവ് മാറ്റിയാണ് ഇവിടെ ഇയാളെ കുത്തിത്തിരുകിയത്. ഇതിനായി ഉന്നത ഇടപെടലുകളുമുണ്ടായി.
മലപ്പുറത്ത് പൊന്നാനി താലൂക്കിലെ പ്രമുഖനായ ഡിവൈഎഫ്ഐ നേതാവിനെയും കണ്ണൂരില്‍ ക്രിമിനല്‍ കേസുകളില്‍ പ്രതിയായ ഡിവൈഎഫ്ഐ നേതാവിനെയും നിയമിച്ചു. കാസര്‍കോട് ജില്ലയില്‍ നിയമിതയായ തൃക്കരിപ്പൂര്‍ സ്വദേശിനിയുടെ കുടുംബം സിപിഎം അനുഭാവികളാണ്.
ജന്മഭൂമി ഓണ്‍ലൈന്‍