വിരാധവധത്തിന് ശേഷം സീതാരാമലക്ഷ്മണന്മാര് ശരഭംഗമുനിയുടെ ആശ്രമത്തിലെത്തുന്നു. ശരഭംഗന് എന്നവാക്കിനര്ത്ഥം ശ്വാസം നിയന്ത്രിച്ചവന് എന്നാണ്. സാക്ഷാല് ഈശ്വരനെ ഇന്ദ്രിയങ്ങളെക്കൊണ്ട് വീക്ഷിച്ചാണ് ശരഭംഗന് പൂജിച്ചത്. അയോദ്ധ്യയില് രാമന് ജനിക്കുമ്പോള് ശരഭംഗന് മൂന്ന് ശ്വാസങ്ങള് മാത്രമേ അവശേഷിച്ചിരുന്നുള്ളൂ. ഈ മൂന്ന് ശ്വാസങ്ങള് കൊണ്ട് ശരഭംഗന് രാമനു വേണ്ടി കാത്തിരുന്നു. രാമനെ ദര്ശിച്ച്, സ്തുതിച്ച ശേഷം യാഗാഗ്നിയില് സ്വയം ദഹിച്ച് മോക്ഷപ്രാപ്തി നേടുന്നു. ഇവിടെ ശരഭംഗന് തന്റെ ശ്വാസത്തേപ്പോലും നിയന്ത്രിച്ച് ലക്ഷ്യപ്രാപ്തിക്കായി കാത്തിരുന്നു. നമുക്കൊക്കെ ഇതേപോലെ വെറും മൂന്നോ, അതിന്റെ ഗുണിതങ്ങളായ സമയം മാത്രമേ അവശേഷിച്ചിട്ടുള്ളൂ. ദൃഢനിശ്ചയത്തിലൂടെ സമയ നിയന്ത്രണം ഏറ്റെടുത്ത് പ്രവര്ത്തിച്ചാല് ലക്ഷ്യം പ്രാപ്തമാകുമെന്ന് ശരഭംഗന്റെ കഥ പഠിപ്പിക്കുന്നു. ഒന്നിനും സമയമില്ല എന്ന പരാതി പറയുന്നത് നമുക്ക് ഒഴിവാക്കാനാവും.
ശരഭംഗന്റെ ജീവത്യാഗമറിഞ്ഞ് മറ്റ് ആശ്രമങ്ങളില് നിന്നുള്ള മുനിമാര് എത്തിച്ചേര്ന്നു. രാമന്റെ ജന്മരഹസ്യവും ലക്ഷ്യവും അറിയുന്ന മുനിമാര് രാമനെ സ്തുതിക്കുന്നു. അവര് ഓരോ ആശ്രമദിക്കും രാമന് കാട്ടിക്കൊടുക്കുന്നു. അങ്ങനെ അവര് മനുഷ്യരുടെ തലയോടുകളും അസ്ഥികളും കൂട്ടിയിട്ടിരിക്കുന്ന ഒരു സ്ഥലത്തെത്തി, രാമന് പര്വത സമാനമായ തലയോടുകളുടെയും അസ്ഥികളുടെയും കൂമ്പാരം കാണിച്ചുകൊടുക്കുന്നു. രാക്ഷസന്മാര് കൊന്നൊടുക്കിയ മുനിമാരുടെ ശരീരാവശിഷ്ടങ്ങള് ആണതെന്ന് അറിയുന്ന രാമന് രാക്ഷസകുലത്തെ ഇല്ലായ്മ ചെയ്യുമെന്ന ഉറപ്പ് മുനിമാര്ക്ക് കൊടുക്കുന്നു. തുടര്ന്ന് സത്സംഗവുമായി രാമലക്ഷ്മണമാര് പതിമൂന്ന് വര്ഷം ഇവിടെയാണ് കഴിയുന്നത്. മുനിമാരില്നിന്നും, അഗസ്ത്യമഹര്ഷിയുടെ ശിഷ്യനായ സുതീഷ്ണനെപറ്റി അറിഞ്ഞ് അവര് സുതീഷ്ണമഹര്ഷിയെ സന്ദര്ശിക്കുന്നു. രാമന്റെ ജന്മം അറിയുന്ന സുതീഷ്ണമഹര്ഷിയും രാമന്റെ ജന്മതത്വം ഒന്നൊന്നായി പറഞ്ഞ് രാമനെ സ്തുതിയ്ക്കുന്നു.
സുതീഷ്ണമഹര്ഷിയുടെ ഗുരുവായ അഗസ്ത്യമഹര്ഷിയെ കാണണം എന്ന ആഗ്രഹം രാമന് അറിയിക്കുന്നു. അവര് അഗസ്ത്യാശ്രമത്തിലേക്ക് യാത്രയായി. അവിടം ശാന്തമാണ്. അവര് ഉപാശ്രമത്തില് താമസിച്ച് അഗസ്ത്യര്ക്ക് കാണാനായി എത്തിയിട്ടുണ്ട് എന്നറിയിച്ചു. രാമനെ കാണാന് കാത്തിരുന്ന അഗസ്ത്യര് ശിഷ്യന്മാരോടൊപ്പം ഉപാശ്രമത്തിലെത്തി രാമനേയും ലക്ഷ്മണനേയും സീതയേയും സ്വീകരിച്ച് ആചാരോപചാരങ്ങള് നല്കി ആദരിച്ച് സല്ക്കരിച്ചു.
അഗസ്ത്യമഹര്ഷി:
ഒരു പെരുവിരലിന്റെയത്ര വലുപ്പം. കുടത്തില് നിന്ന് ജനിച്ചതിനാല് കുംഭസംഭവന് എന്ന് അറിയപ്പെടുന്നു. ചിരഞ്ജീവി. വിന്ധ്യപര്വതത്തിന്റെ അഹന്ത തീര്ത്ത്, വളര്ച്ച സ്തംഭിപ്പിച്ചവന് എന്ന അര്ത്ഥത്തിലാണ് അഗസ്ത്യന് എന്ന പേര്. ബ്രഹ്മാണ്ഡപുരാണത്തില് ഹയഗ്രീവന് അഗസ്ത്യമഹര്ഷിക്ക് പറഞ്ഞുകൊടുക്കുന്നതാണ് ലളിതാസഹസ്രനാമം.
പിഎന് ഭട്ടതിരി
