ദണ്ഡകവനത്തില് ഒരു വൃക്ഷത്തണലില് വിശ്രമിക്കുകയായിരുന്ന സീതാരാമലക്ഷണന്മാരെ ലക്ഷ്യമാക്കി അതിഭീകരനായ ഒരു രാക്ഷസന് വരുന്നുണ്ടായിരുന്നു. ഗുഹപോലെയുള്ള വായില്നിന്ന് തള്ളി നില്ക്കുന്ന ദംഷ്ട്രകള്. ഇടത്തേ തോളില് വച്ചിട്ടുള്ള ശൂലത്തില് തറച്ചിരിക്കുന്ന വന്യമൃഗങ്ങളും മനുഷ്യരും. പച്ചമാംസം തിന്നുകൊണ്ടാണ് വരവ്. രാക്ഷസന്റെ വരവ് കണ്ട രാമന് ലക്ഷ്മണനോട് തയ്യാറാകുവാന് പറയുന്നു. രാക്ഷസന് അടുത്തെത്തി ഗര്ജനത്തോടെ ചോദിക്കുന്നു. ‘ഈ കൊടുംകാട്ടില് സുന്ദരിയായ ഒരു കുമാരിയോടൊപ്പം ജഡാവല്ക്കലവും, അസ്ത്രവും ധരിച്ച് നില്ക്കുന്ന നിങ്ങള് ആരാണ്? എന്താണ് ലക്ഷ്യം? ‘രാമന് തന്റെ സ്വതസിദ്ധമായ മന്ദഹാസത്തോടെ മറുപടി പറയുന്നു. ‘ഞാന് രാമന്. ഇത് എന്റെ പത്നി സീത. കൂടെയുള്ളത് സഹോദരന് ലക്ഷ്മണന്. ഞങ്ങളുടെ ഉദ്ദേശ്യം നിന്നേപ്പോലെയുള്ളവരെ ശിക്ഷിച്ച് മൂന്ന് ലോകവും സംരക്ഷിക്കുക എന്നതാണ്’. ഇത് കേട്ട രാക്ഷസന് അട്ടഹസിച്ച് കൊണ്ട് പറഞ്ഞു, ‘അതിശക്തനായ വിരാധനാണ് ഞാന്. മൂന്ന് ലോകത്തിലും എന്നെ അറിയാത്തവരായി ആരുമില്ല. ഇവിടം വിട്ട് പോയില്ലെങ്കില് ഞാന് നിങ്ങളെ കൊന്ന് ഭക്ഷിക്കും’. ഇതും പറഞ്ഞ് വിരാധന് സീതയെ ആക്രമിക്കാനായി അടുത്തു. രാമന് വിരാധന്റെ കൈകള് ഛേദിച്ചു. അപ്പോള് വിരാധന് രാമന്റെ നേര്ക്ക് അടുത്തു. രാമന് വിരാധന്റെ കാലുകളും ഛേദിച്ചു. ഇഴഞ്ഞ് അവരെ വിഴുങ്ങാനായി എത്തി. അപ്പോള് രാമന് വിരാധന്റെ ശിരസ്സും ഛേദിച്ചു. ഉടനെ ഒരു സുന്ദരരൂപം വിരാധന്റെ ശരീരത്തില് നിന്ന് പുറത്തേയ്ക്ക് വന്നു. ആ രൂപം രാമനെ നമസ്കരിച്ച് സ്തുതിച്ച് കൊണ്ട് പറയുന്നു, ‘ഞാന് ദുര്വാസാവിനാല് ശപിക്കപ്പെട്ട് രാക്ഷസരൂപം പൂണ്ട ഒരു വിദ്യാധരന് ആണ്. അങ്ങയാല് എനിക്ക് പൂര്വരൂപം കിട്ടി.’ ഈ പൂര്വചരിത്രം വിശ്ദീകരിച്ച വിദ്യാധരന് രാമനെ സ്തുതിയ്ക്കുന്നു. ഇതാണ് വിരാധസ്തുതി.
വിരാധനെ, നമുക്ക് നേരിടേണ്ടിവരുന്ന പ്രതിസന്ധികളായി കാണാം. ഒരു പ്രതിസന്ധി നേരിടുമ്പോള് ആദ്യം നമ്മുടെ എകാഗ്രതയെ ബാധിക്കും, അതിലൂടെ അറിവും ഉപയോഗയോഗ്യമാല്ലാതാവും. ഇവിടെ ജ്ഞാനമാകുന്ന വൈദേഹിയാണ് ആദ്യം ആക്രമിക്കപ്പെടുന്നത്. ജ്ഞാനത്തെ ആക്രമിക്കുന്നതിനെ കീഴ്പ്പെടുത്തിയാല് നമുക്ക് വിജയം ലഭിക്കും. പലപ്പോഴും പ്രതിസന്ധി ഘട്ടങ്ങളെ നേരിടേണ്ടിവരുമ്പോള് നാം തളര്ന്ന് പോകും. കാരണം ആ പ്രതിസന്ധിയെ നേരിടാനുള്ള ജ്ഞാനം മാനസിക സമ്മര്ദ്ദത്താല് നമുക്ക് നഷ്ടപ്പെടുന്നു. ഇവിടെ വലിയ ഒരു പ്രതിസന്ധിയെ നേരിട്ട്, അതിനെ പരാജയപ്പെടുത്തിയതിലൂടെ അവര് വിജയത്തിലേക്ക് എത്തിച്ചേര്ന്നു. ഒന്ന് ചിന്തിച്ചാലറിയാം, വിവേകപൂര്വം ജീവിതത്തില് നേരിട്ടിട്ടുള്ള എല്ലാ പ്രതിസന്ധികളെയും നമുക്ക് തരണം ചെയ്യാന് കഴിഞ്ഞിട്ടുണ്ട്. അല്ലാത്തവ നമ്മെ ആക്രമിച്ച് കീഴ്പ്പെടുത്തിയിട്ടുമുണ്ട്.
പി എന് ഭട്ടതിരി
