മലപ്പുറം: സ്വര്‍ണക്കടത്ത് കേസില്‍ അറസ്റ്റിലായ മലപ്പുറം സ്വദേശിയുടെ വീട്ടില്‍ കസ്റ്റംസ് റെയ്ഡ്. കൂട്ടിലങ്ങാടി സ്വദേശി അബ്ദുള്‍ ഹമീദിന്റെ വീട്ടിലാണ് കസ്റ്റംസ് പരിശോധന നടത്തിയത്. കമ്പ്യൂട്ടര്‍, മൊബൈല്‍ ഫോണ്‍ ഉള്‍പ്പെടെയുള്ള സാധനങ്ങള്‍ ഇയാളുടെ വീട്ടില്‍ നിന്ന് പിടിച്ചെടുത്തു. കുടുംബാംഗങ്ങളില്‍ നിന്നും വിവരങ്ങള്‍ ശേഖരിച്ചു.
സ്വര്‍ണക്കടത്തിനായി പണം മുടക്കിയ ആളാണ് അബ്ദുള്‍ ഹമീദ്. കടത്തി കൊണ്ടുവരുന്ന സ്വര്‍ണം വില്‍ക്കാന്‍ സഹായിക്കുന്നതും ഇയാളെന്നാണ് കസ്റ്റംസിന് ലഭിച്ച വിവരം. കേസില്‍ ഇതിനോടകം അഞ്ച് മലപ്പുറം സ്വദേശികളെ കസ്റ്റംസ് പിടികൂടിയിട്ടുണ്ട്. വരും ദിവസങ്ങളില്‍ കൂടുതല്‍ അറസ്റ്റുണ്ടാകുമെന്നാണ് സൂചന.
