കോഴിക്കോട്: കോവിഡ് ചട്ടങ്ങള് ലംഘിച്ച് മേയറും, ഡെപ്യൂട്ടി മേയറും, സ്റ്റാന്റിംഗ് കൗണ്സില് ചെയര്മാന്മാര് അടക്കമുള്ള കൗണ്സിലര്മാരും എരഞ്ഞിപ്പാലത്ത് ശാസ്ത്രി നഗര് പാര്ക്ക് ഉദ്ഘാടനം ചെയ്യാനാണ് മേയറടക്കമുള്ളവര് കോവിഡ് നിയന്ത്രണങ്ങള് ലംഘിച്ചത്. മലബാര് ദേവസ്വം ബോര്ഡ് ഓഫീസുകള് ഉള്ക്കൊള്ളുന്ന ഹൗസ് ഫെഡ് ഓഫീസ് സമുച്ചയത്തിന് സമീപമാണ് പാര്ക്കിന്റെ ഉദ്ഘാടനം നടത്തിയത്.
കോര്പ്പറേഷന് ഔദ്യോഗികമായി പുറത്തുവിട്ട ഉദ്ഘാടന ചിത്രത്തില് തന്നെ ഇരുപത്തിയഞ്ചിലധികം ആളുകളുണ്ട്. കോവിഡ് കാലത്ത് ഉദ്യാനങ്ങളും പാര്ക്കുകളൊന്നും തുറന്നു കൊടുക്കുന്നില്ല. ഇതിനിടയില് ധൃതിപ്പെട്ട് ശാസ്ത്രി നഗര് പാര്ക്ക് ഉദ്ഘാടനം ചെയ്തത് എന്തിനാണെന്നെ ചോദ്യത്തിന് ഉത്തരവുമില്ല. 46 ലക്ഷം രൂപ ചെലവിട്ടാണ് കോര്പ്പറേഷന്റെ നേതൃത്വത്തില് പാര്ക്ക് നിര്മ്മിച്ചത്. 2018 മാര്ച്ചിലാണ് ഇതിന്റെ നിര്മ്മാണം ആരംഭിച്ചത്.
കോവിഡ് നിയന്ത്രണങ്ങള് പാലിക്കണമെന്ന് പറയുന്നവരാണ് പരസ്യമായി ചട്ടങ്ങള് ലംഘിച്ചത്. നഗരത്തില് 10 പേര് പങ്കെടുത്ത പ്രതിഷേധ യോഗത്തിനെതിരെ പോലും പോലീസ് കേസെടുത്തിരുന്നു. തൂണേരിയില് പഞ്ചായത്ത് പ്രസിഡന്റ് പങ്കെടുത്ത യോഗം കോവിഡ് ചട്ടങ്ങള്ക്ക് എതിരായതിനാല് പോലീസ് കേസെടുത്തിട്ടുണ്ട്. എന്നാല് മേയര്, ഡെപ്യൂട്ടി മേയര് എന്നിവര് പരസ്യമായി കോവിഡ് നിയന്ത്രണങ്ങള് ലംഘിച്ചിട്ടും പോലീസ് കേസെടുത്തിട്ടില്ല.
