കാസര്കോട്: സമ്പര്ക്കത്തിലൂടെ ഉള്പ്പെടെ കാസര്കോട് ജില്ലയില് കോവിഡ് പടര്ന്ന് പിടിക്കുമ്പോള് സാമൂഹിക അകലം പാലിക്കാതെ കാസര്കോട് കെഎസ്ആര്ടിസി ഡിപ്പോയില് ഇടതുപക്ഷ തൊഴിലാളി സംഘടനയായ സിഐടിയുടെ നേതൃത്വത്തില് കെഎസ്ആര്ടിഇഎ അംഗങ്ങള് പ്രതിഷേധ സമരം നടത്തിയതായി ആരോപണം.
യൂണിഫോമില് ജോലി സമയത്ത് പ്രതിഷേധ പരിപാടികളില് പങ്കെടുക്കരുതെന്ന സര്ക്കാര് ഉത്തരവ് ലംഘിച്ചാണ് ഇവര് സമരം ചെയ്തതെന്ന ആക്ഷേപം ശക്തമായിരിക്കുകയാണ്. ഇന്ധനവിലവര്ദ്ധനവില് പ്രതിഷേധിച്ചാണ് കേന്ദ്രസര്ക്കാറിനെതിരെ സമരം നടത്തിയത്. സര്വ്വീസുകള് വെട്ടിക്കുറച്ചിട്ടും വിദൂരങ്ങളില് നിന്നുള്പ്പെടെയുള്ള മുഴുവന് ജീവനക്കാരെയും അനാവശ്യമായി ദിവസവും ഡിപ്പോയിലേക്ക് വിളിച്ച് വരുത്തുകയും കോവിഡ് മാനദണ്ഡങ്ങള് ഉള്പ്പെടെ കാറ്റില് പറത്തി സംഘടിക്കാനും സാഹചര്യമുണ്ടാക്കുന്ന അധികൃതരുടെ നടപടിക്കെതിരെ ജീവനക്കാര്ക്കിടയില് തന്നെ പ്രതിഷേധമുണ്ട്.
കാസര്കോട് ഡിപ്പോയില് നിന്ന് അമ്പത് ശതമാനത്തിലധികവും അന്തര് സംസ്ഥാന സര്വ്വീസുകളാണ്. നിലവില് അതിര്ത്തി വരെ മാത്രമായി ഇതില് പകുതിയോടടുപ്പിച്ച് സര്വ്വീസുകളാണ് ഇപ്പോഴുള്ളത്. 38000ലധികം കിലോമീറ്ററുകള് സര്വ്വീസ് നടത്തിയിരുന്ന സ്ഥാനത്ത് ഇന്ന് 8000ത്തിനടുത്ത് കിലോമീറ്റര് മാത്രമാണ് സര്വ്വീസ്.
പരമാവധി ആളുകള് കൂട്ടം കൂടുന്നത് ഒഴിവാക്കണമെന്ന് സര്ക്കാര് പറയുമ്പോഴും ചില ഉദ്യോഗസ്ഥരുടെ പിടിവാശി കാരണം പലരും ദിവസവും വലിയ തുകമുടക്കി വിദൂരസ്ഥലത്ത് നിന്നെത്തി ഡ്യൂട്ടിയില്ലാതെ വൈകീട്ട് വരെ കെഎസ്ആര്ടിസി ഡിപ്പോയില് സമയം ചിലവിട്ട് മടങ്ങി പോവുകയാണെന്നാണ് ജീവനക്കാര് തന്നെ പറയുന്നത്.
