വിലങ്ങാട്: ഉദ്ഘാടനം കഴിഞ്ഞ് അടച്ചിട്ട വിലങ്ങാട് പ്രാഥമിക ആരോഗ്യ കേന്ദ്രം ഉടന്‍ പ്രവര്‍ത്തനം ആരംഭിക്കണമെന്ന ആവശ്യം ശക്തമാകുന്നു. വിലങ്ങാട് അങ്ങാടിയില്‍ നിന്നുള്ള മാലിന്യങ്ങള്‍ ചാക്കിലാക്കി ശേഖരിച്ച് വെക്കുന്നത് ഇപ്പോള്‍ ആരോഗ്യ കേന്ദ്രം കെട്ടിടത്തിലാണ്.
വനവാസി കോളനികള്‍ ഉള്‍പ്പെടുന്ന മലയോര മേഖലയിലെ ഏക ആശ്രയമായിരുന്ന വിലങ്ങാട്ടെ പ്രാഥമികാരോഗ്യ കേന്ദ്രം പ്രവര്‍ത്തനരഹിതമായിട്ട് വര്‍ഷങ്ങളായി.
പ്രദേശത്തുള്ളവര്‍ക്ക് പ്രാഥമിക ചികിത്സ ലഭ്യമാകണമെങ്കില്‍ 10 കിലോമീറ്റര്‍ അകലെ പരപ്പുപാറയിലെ ആരോഗ്യ കേന്ദ്രത്തില്‍ എത്തണം. പ്രാഥമികാരോഗ്യകേന്ദ്രം പുനരാരംഭിക്കാന്‍ സംസ്ഥാന സര്‍ക്കാര്‍ എത്രയും പെട്ടെന്ന് നടപടി സ്വീകരിച്ചില്ലെങ്കില്‍ ശക്തമായ ജനകീയ സമരം സംഘടിപ്പിക്കാനാണ് ബിജെപിയുടെ തീരുമാനം.
എസ്ടി മോര്‍ച്ച ജില്ലാ പ്രസിഡന്റ് എം.സി. അനീഷ്, ബിജെപി മണ്ഡലം പ്രസിഡന്റ് കെ.കെ. രജിത്ത് എന്നിവര്‍ സ്ഥലം സന്ദര്‍ശിച്ചു. വിലങ്ങാട് ഉരുള്‍പൊട്ടല്‍ മേഖലകളും വനവാസി കോളനികളും നേതാക്കള്‍ സന്ദര്‍ശിച്ചു. സുരേഷ് മലയങ്ങാട്, മാമ്പറ്റ ബാലന്‍ എന്നിവരും ഒപ്പമുണ്ടായിരുന്നു.
