കൊച്ചി: സുരേഷ് ഗോപിയുടെ പുതിയ സിനിമയ്ക്ക് കോടതിയുടെ വിലക്ക്. മുളകുപാടം ഫിലിംസിന്റെ ബാനറില് ടോമിച്ചന് മുളകുപാടം നിര്മ്മിക്കുന്ന ‘കടുവാക്കുന്നേല് കുറുവാച്ചന്’ എന്ന സിനിമയ്ക്കാണ് കോടതി വിലക്കേര്പ്പെടുത്തിയത്. സിനിമയുടെ പേരും തിരക്കഥയും പകര്പ്പവകാശം ലംഘിച്ച് എടുത്തതാണെന്നാണ് വാദം. കഥാപാത്രത്തിന്റെ പേരും തിരക്കഥയും പകര്പ്പവകാശം ലംഘിച്ച് എടുത്തതാണെന്നാണ് പരാതി.
പൃഥ്വിരാജിനെ നായകനാക്കി ഷാജി കൈലാസ് സംവിധാനം ചെയ്യുന്ന ‘കടുവ’ എന്ന ചിത്രത്തിന്റെ പിന്നണി പ്രവര്ത്തകരാണ് സിനിമക്കെതിരെ കോടതിയെ സമീപിച്ചത്. കടുവയുടെ തിരക്കഥയും കഥാപാത്രവും സുരേഷ്ഗോപി ചിത്രത്തിനായി പകര്പ്പവകാശം ലംഘിച്ച് പകര്ത്തി എന്ന് ഹര്ജിക്കാര് ആരോപിക്കുന്നു. സംവിധായകനും തിരക്കഥാകൃത്തുമായ ജിനു ഏബ്രഹാം ആണ് കടുവയുടെ രചന.
സുരേഷ്ഗോപി ചിത്രത്തിന്റെ ചിത്രീകരണം തടയണമെന്നാവശ്യപ്പെട്ട് ജിനുവാണ് എറണാകുളം ജില്ലാ കോടതിയില് ഹര്ജി നല്കിയത്. ഹര്ജി സ്വീകരിച്ച കോടതി സുരേഷ്ഗോപി ചിത്രത്തിന്റെ ഷൂട്ടിംഗ്, സോഷ്യല് മാധ്യമങ്ങളിലുള്പ്പെടെ നടത്തുന്ന പ്രചരണം എന്നിവ തടഞ്ഞു. കടുവാക്കുന്നേല് കുറുവച്ചന് എന്ന കഥാപാത്രത്തിന്റെ പേര് കോപ്പിറൈറ്റ് ആക്ട് പ്രകാരം രജിസ്റ്റര് ചെയ്തതിന്റെ രേഖകള് ഹര്ജിഭാഗം കോടതിയില് ഹാജരാക്കി. കഥാപാ്രതത്തിന്റെ പേരടക്കം കടുവയുടെ തിരക്കഥയുടെ എല്ലാ സീനുകളും പ്രത്യേകം രജിസ്റ്റര് ചെയ്തിട്ടുള്ളതായി ഹര്ജിക്കാര് കോടതിയെ അറിയിച്ചു. ഇതിന്റെ രേഖകളും കോടതിയില് ഹാജരാക്കി. ഇവ പരിഗണിച്ചാണ് സുരേഷ്ഗോപി ചിത്രത്തിന് കോടതി വിലക്കേര്പ്പെടുത്തിയത്.
മാജിക് ഫ്രെയിംസിന്റെ ബാനറില് ലിസ്റ്റിന് സ്റ്റീഫന്, പൃഥ്വിരാജ് സുകുമാരന് എന്നിവര് ചേര്ന്നാണ് കടുവ നിര്മ്മിക്കുന്നത്. കഴിഞ്ഞ വര്ഷം പൃഥ്വിരാജിന്റെ ജന്മദിനത്തോടനുബന്ധിച്ച് കടുവയുടെ പ്രഖ്യാപനവും ഫസ്റ്റ് ലുക്ക് പോസ്റ്റര് റിലീസും നടന്നിരുന്നു.
