കോട്ടയം: പുന്നത്തുറ സെന്റ് തോമസ് പള്ളി (വെള്ളാപ്പള്ളിപ്പള്ളി) വികാരി ഫാ. ജോര്‍ജ് എട്ടു പറയെ(51) പള്ളിക്കിണറ്റില്‍ മരിച്ച നിലയില്‍ കണ്ടെത്തിയ സംഭവത്തില്‍ സഭയ്‌ക്കുള്ളില്‍ വിവാദം പുകയുന്നു. വികാരിയുടെ മരണത്തിലെ ദുരൂഹതയാണ് സഭയ്ക്കുള്ളിലും ഇടവകയിലും വിവാദം ഉയരാന്‍ കാരണം. കഴിഞ്ഞ ജനുവരിയിലാണ് അമേരിക്കയില്‍ നിന്നും ഫാ. ജോര്‍ജ് എട്ടുപറയില്‍ പുന്നത്തുറ പള്ളിയില്‍ എത്തിയത്. ഈ സമയം ഇടവകയില്‍ വിശ്വാസികളുടെ ഇടയില്‍ വലിയ അഭിപ്രായ ഭിന്നത നിലനിന്നിരുന്നു.
വര്‍ഷങ്ങള്‍ക്ക് മുമ്പ് മാളിയേക്കല്‍ കുടുംബം പള്ളിയില്‍ സ്ഥാപിച്ച കുരിശ് ചങ്ങനാശ്ശേരി അതിരൂപത ആര്‍ച്ച് ബിഷപ്പും നാട്ടുകാരനുമായ മാര്‍ ജോസഫ് പെരുന്തോട്ടത്തിന്റെ നേതൃത്വത്തില്‍ മാറ്റി സ്ഥാപിച്ചു. ഇത് ഇടവകയില്‍ വലിയ അഭിപ്രായ ഭിന്നതക്ക് കാരണമായി. ഇടവകാംഗങ്ങള്‍ രണ്ട് ചേരിയായി. ഇതേതുടര്‍ന്ന് അന്ന് ഉണ്ടായിരുന്ന വികാരി സ്ഥലമാറ്റം വാങ്ങിപോയി.പിന്നീട് വന്ന വികാരിയും ഇതേ കാരണത്താല്‍ സ്ഥലം മാറ്റം വാങ്ങി. അതിന് ശേഷമാണ് ഫാ. ജോര്‍ജ് എട്ടുപറയില്‍ എത്തിയത്. ഇടവകയിലെ അഭിപ്രായ ഭിന്നത മൂലം അദ്ദേഹവും സ്ഥലമാറ്റം ആവശ്യപ്പെട്ടിരുന്നു.
വികാരിയെ കാണാതാകുന്ന ദിവസം സ്ഥലം മാറ്റം സംബന്ധിച്ച് ചര്‍ച്ച ചെയ്യാന്‍ അദ്ദേഹത്തെ അതിരൂപതയിലേയ്‌ക്ക് വിളിപ്പിച്ചിരുന്നു.അസിസ്റ്റന്റ് വികാരി ഫാ. ബിബിന്‍ തുരുത്തുമാലി പുറത്തുപോയ സമയത്താണ് വികാരിയെ കാണാതാകുന്നത്. നെറ്റ് കൊണ്ട് മൂടിയ കിണറ്റില്‍ ഇരുകൈകളും ബന്ധിച്ച നിലയില്‍ എങ്ങനെ ചാടുമെന്ന സംശയമാണ് നാട്ടുകാര്‍ ഉന്നയിക്കുന്നത്. മാത്രമല്ല കിണറിന്റെ മൂടിയുടെ ചെറിയ വാതിലിലൂടെ മറ്റൊരാളുടെ സഹായമില്ലാതെ ഇറങ്ങാല്‍ കഴിയില്ലെന്നും നാട്ടുകാര്‍ പറയുന്നു.
പള്ളിയിലെ സിസിടിവി കാമറ പ്രവര്‍ത്തന രഹിതമായതും നാട്ടുകാരില്‍ സംശയത്തിന് ഇടനല്‍കുന്നു. നാലാഴ്ച മുന്‍പ് പള്ളിപരിസരത്ത് ഷെഡ്ഡിനു തീപിടിച്ച് നാലുപേര്‍ക്ക് പൊള്ളലേറ്റിരുന്നു. ഇതില്‍ ഒരാളുടെ നില ഗുരുതരമായി തുടരുകയാണ്. ഈ അപകടം ഫാ.ജോര്‍ജിനെ മാനസിക സമ്മര്‍ദത്തിലാക്കിയിരുന്നതായി സഭാ നേതൃത്വം പ്രചരിപ്പിക്കുന്നത്. എന്നാല്‍ യഥാര്‍ത്ഥ വസ്തുത എന്താണെന്ന് സഭാ നേതൃത്വത്തിനെ അറിയൂ.സഭാ നേതൃത്വം വികാരിയെ മാനസികമായി പീഡിപ്പിച്ചോ എന്ന സംശയം ചില കോണുകളില്‍ നിന്നും ഉയരുന്നുണ്ട്.
പോലീസിന്റെ ഇടപെടല്‍ ആദ്യം മുതല്‍ സംശയത്തിന് ഇടനല്‍കുന്നതാണ്. സഭാ നേതൃത്വം പ്രചരിപ്പിക്കുന്ന കഥ ഏറ്റുപറയുന്ന ജോലിയാണ് പോലീസ് ചെയ്യുന്നതെന്ന ആരോപണവും ശക്തമാണ്.സംഭവത്തില്‍ അന്വേഷണം ഊര്‍ജിതമാണെന്ന സ്ഥിരം പല്ലവി മാത്രമാണ് പോലീസ് പറയുന്നത്.
