ബദിയടുക്ക: ചെര്ക്കള-കല്ലടുക്ക അന്തര് സംസ്ഥാന പാതയില് ഇത്തവണയും ഗതാഗതം മുടങ്ങുമെന്ന ആശങ്കയുയരുന്നു. കനത്ത മഴയെ തുടര്ന്ന് പാതക്കരികിലെ കരിമ്പില കുന്നില് വലിയ വിള്ളല് രൂപപ്പെട്ടിരിക്കുകയാണ്. കഴിഞ്ഞ കാലവര്ഷത്തില് ഈ ഭാഗത്തെ കുന്നിടിഞ്ഞ് മണ്ണ് റോഡിലേക്ക് വീണിരുന്നു. ഇതേ തുടര്ന്ന് ഈ റൂട്ടില് മുപ്പത്താറ് ദിവസമാണ് ഗതാഗതം മുടങ്ങിയത്.
ജൂലൈ 24ന് മുടങ്ങിയ ഗതാഗതം ആഗസ്ത് 29നാണ് പുനസ്ഥാപിക്കപ്പെട്ടത്. റോഡില് വീണ് മൂടിയിരുന്ന അഞ്ചായിരത്തോളം ലോഡ് മണ്ണ് ഗതാഗതം സുഗമമാക്കുന്നതിനായി നീക്കം ചെയ്യേണ്ടിവന്നു.
കുന്നില് നിന്ന് നിയന്ത്രണമില്ലാതെ മണ്ണെടുത്തതാണ് വിള്ളല് സംഭവിക്കാന് കാരണമായത്. റോഡ് ബി.എം.ബി.സി. ചെയ്യുന്നതിന്റെ ഭാഗമായാണ് വീതികൂട്ടുന്നതിനായി കുന്നിടിച്ചത്. കുറച്ചുഭാഗത്തെ മണ്ണ് നീക്കാനായിരുന്നു തീരുമാനമെങ്കിലും മണ്ണെടുക്കുന്തോറും കുന്ന് ഇടിയുകയായിരുന്നു. 20 അടിയോളം ഉയരത്തിലുള്ള കുന്നാണ് അപകടാവസ്ഥയിലായത്. ഇപ്പോഴും വിള്ളലില് മണ്ണ് ഇളകി കിടക്കുകയാണ്.
കുന്നിന് മുകളിലേക്ക് അക്വേഷ്യാമരങ്ങളും ചാഞ്ഞുകിടക്കുന്നുണ്ട്. മഴയുടെ തീവ്രത കൂടിയാല് റോഡിലേക്ക് മണ്ണ് വീഴുമോയെന്ന ആശങ്ക യാത്രക്കാര്ക്കുണ്ട്.
മണ്ണ് വീണ് ഗതാഗതം മുടങ്ങുന്ന സ്ഥിതിയുണ്ടായാല് കര്ണാടകയിലെ പുത്തൂര്, ബംഗളൂരു ഭാഗങ്ങളിലേക്ക് പോകുന്ന യാത്രക്കാര് ദുരിതത്തിലാകും. കിഫ്ബിയില് ഉള്പ്പെടുത്തി 39.76 കോടി രൂപ ചെലവിട്ടാണ് റോഡ് നിര്മ്മിച്ചിരുന്നത്. ചെര്ളടുക്ക മുതല് ഉക്കിനടുക്ക വരെയുള്ള 13 കിലോമീറ്റര് റോഡാണ് മെയ് മാസത്തില് നവീകരിച്ചത്. 18 കിലോ മീറ്റര് റോഡാണ് കാസര്കോട് മണ്ഡലത്തിലൂടെ കടന്ന് പോകുന്നത്. റോഡിന് സംരക്ഷണഭിത്തി വേണമെന്ന ആവശ്യം ഇതുവരെ നടപ്പായിട്ടില്ലെന്ന് പ്രദേശവാസികള് പറയുന്നു.
