ഇസ്ലാമാബാദ്: കഴിഞ്ഞയാഴ്ച കറാച്ചിയിലെ താമസമേഖലയില് തകര്ന്നുവീണ പാക്കിസ്ഥാന് ഇന്റര്നാഷനല് എയര്ലൈന്സ് (പിഐഎ) വിമാനത്തിന്റെ പൈലറ്റ് മുന്നറിയിപ്പുകള് അവഗണിച്ചുവെന്ന് റിപ്പോര്ട്ട്. സമുദ്രനിരപ്പില് നിന്ന് വിമാനമുള്ള ഉയരം, വേഗത എന്നിവ സംബന്ധിച്ച ട്രാഫിക് കണ്ട്രോളര്മാരുടെ മൂന്ന് മുന്നറിയിപ്പുകളാണ് പൈലറ്റ് അവഗണിച്ചത്.
സ്ഥിതി നിയന്ത്രിക്കാന് സാധിക്കുമെന്നും പ്രശ്നമില്ലെന്നുമായിരുന്നു പൈലറ്റിന്റെ പ്രതികരണം. സാങ്കേതിക തകരാറാണോ പൈലറ്റിന്റെ പിഴവ് ആണോ അപകട കാരണം എന്നത് സംബന്ധിച്ചുള്ള ആരോപണങ്ങള് കഴിഞ്ഞ ദിവസം തന്നെ ഉയര്ന്നിരുന്നു. ലാഹോറിലെ ജിന്ന അന്താരാഷ്ട്ര വിമാനത്താവളത്തില് നിന്ന് 15 നോട്ടിക്കല് മൈല് അകലെയുണ്ടായിരുന്ന വിമാനം പാലിക്കേണ്ട ഉയരമായ ഏഴായിരം അടിക്ക് പകരം പതിനായിരം അടി ഉയരത്തില് വിമാനം പറപ്പിച്ചപ്പോഴാണ് എയര് ട്രാഫിക് കണ്ട്രോള് ആദ്യ മുന്നറിയിപ്പ് നല്കിയത്.
വിമാനം താഴേക്ക് പറപ്പിക്കുന്നതിന് പകരം കുഴപ്പമില്ലെന്നായിരുന്നു പൈലറ്റിന്റെ മറുപടി. വിമാനത്താവളത്തില് നിന്ന് പത്ത് നോട്ടിക്കല് മൈല് അകലെയായപ്പോള് പറക്കേണ്ടിയിരുന്ന 3000 അടിക്ക് പകരം ഏഴായിരം അടി ഉയരത്തിലായിരുന്നു വിമാനം. സ്ഥിതി താന് കൈകാര്യം ചെയ്യുമെന്നും ലാന്ഡിംഗിന് തയ്യാറാണെന്നുമായിരുന്നു പൈലറ്റിന്റെ മറുപടി.
2.34 മണിക്കൂര് പറക്കാനുണ്ടായിരുന്ന ഇന്ധനം വിമാനത്തിലുണ്ടായിരുന്നു. വിമാനം ലാന്ഡ് ചെയ്യാന് പൈലറ്റ് ആദ്യം നടത്തിയ ശ്രമത്തിനിടെ എഞ്ചിന് മൂന്ന് തവണയാണ് റണ്വേയില് ഉരസിയെന്നും കണ്ടെത്തിയിട്ടുണ്ടെന്ന് പാകിസ്താന് സിവില് ഏവിയേഷന് അതോറിറ്റിയുടെ റിപ്പോര്ട്ടില് പറയുന്നു. ഉരസലിനിടെ എഞ്ചിനുള്ളിലെ ഓയില് ടാങ്കിനും ഫ്യുവല് പ്ബിനും തകരാര് ഉണ്ടായി. ഇതേ തുടര്ന്നാണ് വീണ്ടും പറന്നുയര്ന്ന വിമാനത്തിന് നിശ്ചിത ഉയരത്തില് എത്താനും വേഗം കൈവരിക്കാനും കഴിയാതെ വന്നത്.
ആദ്യ ശ്രമത്തില് ലാന്ഡ് ചെയ്യാന് കഴിയാതിരുന്നതോടെ വീണ്ടും പറന്നുയരാന് പൈലറ്റ് സ്വയം തീരുമാനമെടുത്തു. പറന്നുയര്ന്ന ശേഷമാണ് ലാന്ഡിംഗ് ഗിയര് പ്രവര്ത്തിക്കുന്നില്ല എന്ന വിവരം പൈലറ്റ് എടിസിയെ അറിയിച്ചത്. ഇതോടെ 3000 അടി ഉയരത്തിലേക്ക് പറന്നുയരാന് എടിസി പൈലറ്റിന് നിര്ദ്ദേശം നല്കി. എന്നാല് 1800 അടി ഉയരത്തില് എത്താന് മാത്രമെ പൈലറ്റിന് കഴിഞ്ഞുള്ളു. ഇതോടെ 3000 അടി ഉയരത്തില് പറന്നുയരാന് വീണ്ടും എടിസി പൈലറ്റിന് നിര്ദ്ദേശം നല്കി. 3000 അടി ഉയരത്തില് പറക്കാന് ശ്രമിക്കുകയായിരുന്നുവെന്ന് ഫസ്റ്റ് ഓഫീസര് മറുപടിയും നല്കിയെന്നാണ് റിപ്പോര്ട്ടുകള്.
വെള്ളിയാഴ്ചയാണ് 97 പേരുടെ മരണത്തിനിടയാക്കിയ വിമാനാപകടമുണ്ടായത്. പാക്കിസ്ഥാന്റെ ചരിത്രത്തിലെ ഏറ്റവും വലിയ വിമാനാപകടങ്ങളിലൊന്നായിരുന്നു ഇത്.
