വടകര: അഴിത്തലയില്‍ നിന്നും മത്സ്യബന്ധനത്തിനായി കടലില്‍പോയ വള്ളം മറിഞ്ഞു. അപകടത്തില്‍പ്പെട്ട രണ്ടുപേര്‍ അത്ഭുതകരമായി രക്ഷപ്പെട്ടു. അഴിത്തല മുസ്ല്യാരവിട പുതിയപുരയില്‍ റഹീം(42), വയല്‍വളപ്പില്‍ സിദ്ധിഖ് (45) എന്നിവരാണ് അപകടത്തില്‍പ്പെട്ടത്.
തിങ്കളാഴ്ച പുലര്‍ച്ചെ നാലുമണിയോടെയാണിവര്‍ കടലില്‍ പോയത്. 4.30 ഓടെ വള്ളം മറിഞ്ഞു. ശക്തമായ തിരയാണ് ഇന്നലെയുണ്ടായിരുന്നത്. 45 മിനുട്ടോളം ഇരുവരും കടലില്‍ മരണത്തെ മുഖാമുഖം കണ്ട് നില്‍ക്കുകയായിരുന്നു. ഈ സമയം ഇതുവഴി മത്സ്യബന്ധനത്തിനു പോവുകയായിരുന്ന മറ്റ് വള്ളക്കാര്‍ ഇവരെ രക്ഷപ്പെടുത്തുകയായിരുന്നു.
