ന്യൂദല്ഹി: ഇതര സംസ്ഥാനതൊഴിലാളികള്ക്ക് അവരുടെ നാട്ടിലേക്ക് മടങ്ങാന് പ്രത്യേക ട്രെയിന് അനുവദിക്കില്ലെന്ന് കേന്ദ്രസര്ക്കാര്. ലോക്ക്ഡൗണില് ഇളവ് നല്കുന്നതിനൊപ്പം പ്രത്യേക ട്രെയിന് അനുവദിക്കണമെന്ന് കേരളം ഉള്പ്പടെയുള്ള ചില സംസ്ഥാനങ്ങള് പ്രധാനമന്ത്രിയുമായുള്ള അവലോകന യോഗത്തില് അറിയിച്ചിരുന്നു. എന്നാല് ഇക്കാര്യം ഇപ്പോള് പ്രായോഗികമല്ലെന്നാണ് കേന്ദ്രം വിശദീകരിക്കുന്നത്.
സംസ്ഥാനത്ത് 3,85000 ഇതര സംസ്ഥാന തൊഴിലാളികളുണ്ടെന്നും ഇവര്ക്ക് സ്വന്തം നാട്ടിലേക്ക് മടങ്ങാന് സൗകര്യം ഉണ്ടാക്കണമെന്നും ഇന്നലെ മുഖ്യമന്ത്രി പിണറായി വിജയന് ആവശ്യപ്പെട്ടിരുന്നു. ഏപ്രില് 14 ന് ശേഷം ഇതരസംസ്ഥാന തൊഴിലാളികള്ക്ക് മടങ്ങാനായി നോണ് സ്റ്റോപ്പ് ട്രെയിന് അനുവദിക്കണമെന്നായിരുന്നു പ്രധാന ആവശ്യം. എന്നാല് ഇത് പ്രായോഗികമല്ലെന്നാണ് കേന്ദ്രം അറിയിച്ചിരിക്കുന്നത്.
അതേസമയം ദേശീയ ലോക്ക് ഡൗണ് നീട്ടുന്നതില് കേന്ദ്രത്തിന്റെ ഔദ്യോഗിക പ്രഖ്യാപനം ഇന്നുണ്ടായേക്കും. ഇന്നലെ മുഖ്യമന്ത്രിമാരുമായി പ്രധാനമന്ത്രി നരേന്ദ്ര മോദി നടത്തിയ ചര്ച്ചയില് ലോക്ക് ഡൗണ് രണ്ടാഴ്ചത്തേക്ക് കൂടി നീട്ടാന് ധാരണയായിരുന്നു. കൂടുതല് ഇളവുകളോടെ ലോക്ക് ഡൗണ് നീട്ടാനാണ് ധാരണ. കാര്ഷിക മേഖലയ്ക്കും നിര്മ്മാണ മേഖലയ്ക്കും ഇളവ് പ്രഖ്യാപിച്ചേക്കാം.
സര്ക്കാര് ഓഫീസുകളുടെ പ്രവര്ത്തനവും ഭാഗികമായി വീണ്ടും തുടങ്ങും. മന്ത്രിമാരോട് ഓഫീസുകളില് പ്രവര്ത്തനം തുടങ്ങാന് നിര്ദ്ദേശം നല്കുമെന്ന സൂചനയുണ്ട്. പ്രധാനമന്ത്രിയുടെ അഭിസംബോധന എപ്പോഴുണ്ടാകുമെന്നും ഇന്ന് വ്യക്തമാകും. മഹാരാഷ്ട്ര, തെലങ്കാന, കര്ണാടക, പശ്ചിമബംഗാള് എന്നീ സംസ്ഥാനങ്ങള് ഇന്നലെ വൈകിട്ട് തന്നെ ഏപ്രില് മുപ്പത് വരെ ലോക്ക്ഡൗണ് നീട്ടിയിരുന്നു.
